DILI, 01 agostu 2023 (TATOLI) – Alunu sira husi Eskola Bázika Sentrál (EBC, sigla portugés) Farol ladún kontente ho merenda eskolár ne’ebé sira hetan tanba uitoan liu. Meliani da Cunha, alunu ida iha 9.o anu hatete katak nia lagosta han na’an karau (bife) no etu ne’ebé koziñeira sira tau ne’e uitoan loos hanesan mós ho modo-been.
“Hahán di’ak ona, maibe ha’u ladún gosta han na’an karau tanba na’an uat halo nehan moras. Depois Ami mós halo protesta tan sira tau etu uitoan loos. Dalaruma modo mós sira tau ladún barak no modo-been mós labarak. Ne’e mak halo ami ladún gosta”, Meliani da Cunha hatete ba Tatoli.
Hanoin hanesan mós hato’o husi Jebedeu da Costa, estudante husi eskola hanesan, katak sira tau etu natoon de’it. Modo ne’ebé sira han maka na’an-karau (bife), koto, manu-tolun, fore-mungu no susu-been. “Hahán di’ak maibé ami husu aumenta tan etu”.
Iha sorin seluk, Clarita Lay konta mós katak hahán labarak no “bife musan haat la’e lima de’it ho manu-tolun ida. Hakarak aumenta etu kanuru ida ho balu mós di’ak, maibe ida ne’e sira tau dalaruma la to’o tan kanuru ida”, nia relata.
“Ami han la bosu, ami bá sosa fali etu sentavu 0,50 ne’ebé ema fa’an iha eskola hodi han. Ami hakarak ne’e iha variedade hahán, loroloron han hela de’it hanesan halo ami baruk fali”, nia salienta.
Kestiona sobre preokupasaun alunu sira, Diretora EBC, Filomena Belo Freitas, admite katak ida ne’e falla husi koziñeira sira inklui mós husi jestora. Tanba ne’e, nia sei halo reuniaun ho te’in-na’in sira hodi aumenta etu husi kanuru ida ba rua.
Iha sorin seluk, koziñeira Fernanda Pereira haktuir katak etu ne’ebé fó ba estudante sira uitoan de’it ne’e, tanba fó tuir kuantidade alunu sira no tenke jere hahán ne’ebé iha no hanesan koziñeira sira labele kontra fali buat ne’ebé maka deside antes.
“Hau laiha ideia kona-ba etu uitoan. Ami tenta jere didi’ak hahán ba alunu sira, tanba barak no balun hakarak han repete [dala rua]”, nia konta.
Relasiona ho Programa Merenda Eskolár ne’e, IX Governu kompromente ona atu transforma programa ne’e ba refeisaun “manas” no nutritivu ba labarik sira. Asuntu ne’e Ezekutivu tau ona iha nia prioridade iha mandatu ba loron 120 nian.
Nune’e, Diretora EBC Farol apoia totál ba programa refere no nia espera katak sei iha hahán oioin. “Implementasaun refeisaun manas ne’e di’ak, tanba ida ne’ebé agora la’o hela ne’e la’ós merenda eskolár. Bainhira ko’alia kona-ba merenda eskolár ne’ebé fó ba alunu sira mak susu-been, paun no keiju. Loloos ne’e labele tau naran merenda eskolár, refeisaun manas mak tuir programa ne’ebé implementa tanba nia hahán ne’e todan”, katak.
Filomena Belo Freitas salienta katak EBC Farol iha koziñeira 15 ne’ebé prepara merenda ba alunu 2.157 husi 1, 2 no 3 siklu. Sira hetan insentivu $75 ba prepara hahán ba loron 22. Nune’e dirijente eskola refere husu ba Governu atu hasa’e insentivu ba te’in-na’in sira.
“Hau-nian sujestaun de’it, tanba koziñeira sira ne’e te’in ihaa sanan boot, hiit no hatún sanan loroloron. Husu Governu bainhira halo ona mudansa ba implementasaun refeisaun manas ne’e bele mos aumenta sira-nian osan”, sujere.
Nia rekomenda mós atu iha loron sesta-feira ne’e bele fó susu-been no ai-fuan ba estudante sira. Merenda eskolár iha EBC Farol husi segunda to’o kinta tein foos-metan, tersa foos-mutin, kuarta arroz fugadu no sesta foremungu no susu-been.
Reponsavel ne’e akresenta katak kada alunu hetan sentavu 0,42 ba merenda eskolár ne’e. Husi osan ne’e fahe sentavu 0,35 ba han no restu sentavu 0,07 uza hodi sosa fali buat seluk hodi kompleta nesesidade koziña nian.
Programa Merenda Eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loron-loron ho hahán saudável, ekilibrada no indispensável ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu no aprendizajen.
Notísira relevante: Governu aloka miliaun $15 ba merenda eskolár iha 2023
Jornalista: Tomé Amado
Editora: Maria Auxiliadora
