DILI, 23 agostu 2023 (TATOLI) – Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino hasoru malu ho Diretór Unidade Estratejia Parseria World Food Programme (WFP), Stanlake hasoru malu hodi ko’alia kona-ba oinsa hametin liu servisu bilaterál iha futuru.
Diretór WFP ne’e sente kontente tanba antes ne’e mai ona Timor-Leste iha tinan hirak liubá no ohin fila fali hodi kontinua servisu ne’ebé antes ne’e la’o tiha ona.
“Iha tinan hirak liubá ha’u mai ona Timor, ohin ha’u mai fila-fali atu haree oinsá mak WFP bele suporta Governu iha tempu agora, liuliu iha área seguransa alimentár oinsá atu eradika má-nutrisaun, stunting no oinsá atu eleva ekonomia iha Timor-Leste”, Stanlake dehan iha Palásiu Governu, ohin.
Nia hatutan, atu hasa’e kuantidade produsaun iha rai laran hodi garante seguransa alimentár ne’e la’os parte ida nia responsabilidade mesak, maibé presiza parte hotu servisu hamutuk hodi integra programa sira.
Tuir WFP, problema globál ne’ebé akontese afeta mós ba Timor-Leste, tanba ne’e ba kestaun seguransa alimentár nian presiza análize impaktu globál no lokál nian, nune’e presiza servisu hamutuk ho parseiru sira oinsá aliña elementu ba soberania alimentár iha Timor-Leste.
Iha fatin hanesan, Vise-Primeiru Ministru, hatete enkontru ho WFP ne’ebé mai husi Roma, diskute issu sira ne’ebé importante ba Timor-Leste atu halo aprosimasaun ho asaun ne’ebé integradu hanesan, seguransa alimentár, má-nutrisaun no stunting.
Ba asuntu ida ne’e presiza servisu inter-ministeriál nian, maske buat barak halo ona, maibé ba futuru presiza iha plataforma ba protesaun sosiál atu bele servisu hamutuk ba oin.
“Ita iha ona programa, merenda eskolár, bolsa da mãe no ita iha instituisaun oioin tanba ne’e ita presiza halo ona asaun sira ne’ebé organizadu, hodi sinkroniza planu programa hodi fó fatin ba ajénsia sira atu ita bele halo asaun hamutuk”, nia konklui.
Jornalista: Hortencio Sanchez
Editór : Zezito Silva
