DILI, 31 agostu 2023 (TATOLI)—Ministru Administrasaun Estatál (MAE), Tomás do Rosário Cabral, sujere programa merenda eskolar hosi sentavu 45 ba dólar ida ($1), tanba merenda eskolár ne’ebé ho kualidade ne’e mak implementa $1 kada estudante ida.
“Presiza dólar ida ba merenda eskolár ne’ebé ho kualidade agora merenda eskolár ho sentavus 45 ne’e hodi halo saida, la halo buat ida. Tanba ne’e, husu ba deputadu sira bainhira ko’alia kona-ba merenda eskolár ne’e presiza aumenta. Tenke aumenta, karik hakarak merenda eskolár ho kualidade iha eskola sira tenke aumenta osan,” Governante ne’e hateten ba jornalista sira, iha Delta Nova, kinta ne’e.
Tanba, nia dehan, IX Governu Konstitusionál nian atu implementa refeisaun manas ba alunu sira-ne’e no ne’e tenke bazeia duni ba aihan nutritivu no variedade, nune’e alunu sira bele konsumu ho di’ak hodi bele ajuda sira partisipa iha sala-de-aula ho di’ak liután.
Programa Merenda Eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loro-loron ho hahán saudável, ekilibrada no indispensável ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu no aprendizajen.
Maibé, nia hatutan, Orsamentu Jerál Estadu aprova tarde, nune’e iha fulan janeiru, fevereiru merenda eskolár labele la’o.
“Tanba ne’e mak Governu ida-ne’e kria Sekretáriu Estadu ba Kooperativa ho Dezenvolvimentu Lokál hodi haree asuntu ne’e. Atu nune’e loke kooperativa, para osan seidauk aprova, eskola bele foti iha kooperativa hodi fó merenda ba estudante sira,” nia rekomenda.
Iha tinan 2005, Governu servisu hamutuk ho World Food Program (WFP), implementa programa merenda eskolár.
Iha tinan 2012, Governu foti responsabilidade jere programa ne’e iha territóriu nasionál ho objetivu atu hamenus hamlaha, redús defisiénsia mikronutriente no anemia ba labarik sira no hasa’e taxa partisipasaun labarik iha aula-laran.
Parlamentu Nasionál hasa’e ona orsamentu merenda eskolár hosi sentavu 0,25 ba sentavu 0,42 kada estudante, maibé implementasaun labarik sira sei han etu mutin no han hahan sira importadu mak barak.
Jornalista : Osória Marques
Editór : Cancio Ximenes
