DILI, 01 setembru 2023 (TATOLI)—Diretór Manutensaun no Operasaun Bee Timor-Leste, Empreza Públika (BTL, E.P), Aleixo dos Santos, hateten, tékniku sira daudaun halo esforsu hodi rezolve bee-moos iha Bekusi, suku Becora, postu administrativu Cristo Rei, munisípiu Dili.
“Bomba iha Bekusi ne’e ita iha problema boot, ne’ebé tékniku sira fakar fali mina ba rai ku’ak hodi hasai bomba ne’e tanba metin tiha iha ne’ebá. Horseik (kinta) sira hosi H2O bá halo identifikasaun no rekomenda katak fui mina atubele hasai bomba ne’e,” Diretór Aleixo dos Santos, informa ba Agência Tatoli via telefónika, sesta ne’e.
Notísia relevante : Kondisaun eletrisidade la estável impaktu ba distribuisaun bee-moos iha Bekusi
Nia akresenta, tékniku sira ohin (sesta) foin fakar mina, nune’e espera katak mamar atu sira bele hatun.
“Depois ha’u konfirma fali katak sira bele hasai entaun bele hasai tiha no sei hamoos tan, depois halo teste fali. Rezolve problema ne’e tuir loloos loron-tolu hotu ona maibé aban (sábadu) la serbisu maibé ami sei koko atubele serbisu atu finaliza tiha, nune’e semana oin bele distribui hikas bee ba komunidade,” nia tenik.
Iha sorin seluk, BTL, E.P planeia ona atu monta tanki bee-moos iha sentru balun hodi fasilita bee provizória ba populasaun sira hodi hein bomba di’ak.
“Sentru ne’ebé BTL, E.P identifika atu tau tanki bee mak iha rate Bekusi nia oin no fatin tolu seluk iha Bekusi,” Diretór adianta.
Jornalista : Antónia Gusmão
Editora : Julia Chatarina
