DILI, 06 setembru 2023 (TATOLI)–Governu liuhosi Diresaun Nasionál Transporte Terrestre (DNTT) planeia reativa parajen transporte públiku (halte) antigu ne’ebé harii iha tempu Indonézia nian.
“Konstrusaun halte ne’e Governu anteriór planeia konstrui 64 maibé tanba la biban ona entaun planu ne’e la konsege realiza, ne’ebé dala ruma tinan 2024 maibé ami hetan orientasaun katak atu reativa fali halte sira ne’ebé konstrui desde tempu Indonézia nian. Sira ne’ebé a’at hadi’a hodi nune’e bele utiliza,” Diretór nasionál Transporte Terrestre, António da Costa, informa ba Agência Tatoli, iha ninia knaar fatin, Balide, kuarta ne’e.
Antes ne’e, Departamentu Tráfiku Rodaviária DNTT identifika parajen antigu ba transporte públiku sira iha Dili laran hamutuk 16.
Ligadu ho polítika DNTT halo jestaun ba parajen antigu sira, maka sei organiza transporte sira atu sirkula ho tempu.
“Hanesan ita hotu hatene katak mikrolete no taxi sira ne’e privadu, entaun difisil atu kontrola, ne’ebé iha outubru 2022 DNTT konvida karreta na’in sira hodi partisipa reuniaun hodi orienta sira kria asosiasaun ida ne’ebé sai nu’udar parseiru Governu, nune’e Governu bele organiza transporte sira ne’e ho di’ak. Nune’e asosiasaun mak halo rekrutamentu ba ema sira ne’ebé sei lori karreta, kuandu asosiasaun la halo tuir kritéria sira ne’e, Governu liuhosi DNTT bele aplika multa ba asosiasaun,” nia esplika.
Notísia relevante : Governu planu sei harii halte bus 60 iha kapitál Dili
DNTT organiza ona reuniaun ho karreta na’in sira ba dala-rua ona maibé seidauk iha desizaun ruma hodi kria asosiasaun. Tanba iha nasaun seluk transporte públiku sira regula hosi asosiasaun ka empreza ida, ne’ebé nu’udar parseiru Governu nian maibé iha Timor diferente, ba ema individuu nian.
“Kuandu iha ona asosiasaun ida bainhira hasoru difikuldade ruma hanesan folin kombustível sa’e, la presiza halo greve maibé deside reprezentante ida hodi ko’alia ho DNTT hodi buka dalan, la presiza deside halo ‘mogok’ maibé nafatin halo movimentu hodi tula estudante sira,” nia tenik.
Diretór dehan, loloos transporte ida bainhira para iha parajen ne’e ho durasaun minutu lima maibé realidade iha Timor, transporte hanesan bus sira ne’ebé tula pasajeiru nakonu ona maibé sei halo movimentu ba mai iha Dili laran.
“Iha tinan 2022, Governu serbisu hamutuk ho ADB hodi kontratu empreza Paru hosi Austrália hodi halo estudu instala diresaun inklui halte no terminál iha Dili no munisípiu. Daudaun sira halo hela estudu, kuandu ramata avansa ba konstrusaun, depende desizaun Governu,” nia adianta.
António da Costa konsidera presiza sosializasaun ba motorista no pasajeiru sira ligadu ho utiliza parajen.
“Ho kriasaun asosiasaun ida ka empreza ida hodi akumula karreta sira hanesan mikrolete no taxi nune’e iha orientasaun klaru tanba iha ona asosiasaun ida depois aplika regra ne’e konserteza katak sei implementa ho di’ak maibé bainhira laiha asosiasaun ida ita labele obriga ema ida,” Diretór salienta.
Jornalista : Antónia Gusmão
Editora : Julia Chatarina
