Governu planu sei harii halte bus 60 iha kapitál Dili
DILI, 16 fevereiru 2023 (TATOLI)— Ministériu Transporte Komunikasaun (MTK), liuhosi Diresaun Nasional Transporte no Terrestre (DNTT) iha ona planu sei harii halte (Parajen ba Transporte Públiku) bus foun hamutuk 60 iha kapitál Dili.
“Ita iha planu sei harii halte bus ne’e, hamutuk 60 iha kapitál Dili,” Diretór Nasional Transporte no Terrestre (DNTT) António da Costa dehan ba Agência Tatoli iha nia-knaar-fatin, Balide Dili, kinta ne’e.
Nia dehan, ida ne’e planu Governu nian atu harii duni maibé difikuldade ne’ebé sira-nia parte hasoru mak haree ba situasaun Dili nia estrada kloot no komunidade balu hela to’o mai iha trotoár leten.
Haree ba situasaun ida ne’e, Governu sei inklui Autoridade Munisípiu Dili, no Ministériu Obra Públika (MOP) atu oinsá halo aprovimasaun ba komunidade hodi sosializa fungsaun hosi harii halte bus ne’e rasik.
“Ita sei kria ekipa ida antes estabelese halte bus no tenke halo sosializasaun nune’e públiku hatene saida mak halte bus ne’e rasik. Tanba, ida ne’e bainhira funsiona ona, pasajeiru sira tenke hein iha fatin halte ne’e no kondutór mós atu tula pasajeiru labele naran para iha dalan maibé tenke tula iha halte bus,” António hateten.
Nia dehan, bainhira Governu estabelese ona halte bus ida ne’e sei vale hotu ba taxista, bus no mikrolet ne’ebe tenke tula pasajeiru iha halte bus ne’e hotu.
“Maibé atu harii sei han tempu oituan, tanba haree ba fatin sira atu estabelese halte bus no tenke sosializa uluk ba públiku atu hatene funsaun hosi halte bus, antes harii,” nia hateten.
Jornalista : Arminda Fonseca
Editora : Armandina Moniz
