DILI, 14 setembru 2023 (TATOLI)—Governu liuhosi Sekretaria Estadu Formasaun Profisionál no Empregu (SEFOPE) despede traballadór estajiáriu timor-oan na’in-13 ne’ebé mak sei bá serbisu iha Japaun no iha tempu hanesan asina deklarasaun ba Technical Intern Trainer (TIT).
Iha faze dahuluk, traballadór na’in-hitu mak sei desloka uluk iha loron 16 setembru, kompostu hosi feto na’in-haat no mane na’in-tolu, enkuantu traballadór seluk sei desloka ba faze daruak.
Antigu Primeiru-Ministru (PM), Taur Matan Ruak, ne’ebé partisipa iha serimónia despedida ne’e, fó hanoin ba traballadór sira atu serbisu ho disiplina tanba molok Japaun atu simu timor-oan bá serbisu, Governu hamutuk ho parseiru halo esforsu ona iha tinan naruk nia laran.
“Loron ne’e nu’udar loron istóriku ida ba ita, tanba ba dahuluk ita haruka ita-nia oan sira bá Japaun, esforsu ida-ne’e akontese lori tinan naruk loos, finalmente Japaun aseita simu ita-nia oan sira. Japaun hanesan nasaun ida dezenvolvidu iha mundu, liu-liu iha rejiaun ne’e,” Taur hateten iha ámbitu serimónia despedida traballadór, iha edifísiu SEFOPE, Caicoli, kinta ne’e.
Notísia relevante : Japaun mantein reforsa kooperasaun ho Timor-Leste
Nune’e, Antigu Xefe Governu ne’e enkoraja traballadór sira atu kontinua mantein disiplina no pontualidade iha fatin serbisu no respeitu ierarkia.
“Tenke haree ida ne’ebé mak ki’ik respeita ema ne’ebé boot, dezempeñu traballadór sira-nia ne’e importante hodi loke dalan ba sira ne’ebé sei tuir mai,” nia akresenta.
Iha biban hanesan, Sekretáriu Estadu Formasaun Profisionál no Empregu, Rogério de Araújo Mendonça, dehan, joven sira ne’ebé hetan ona oportunidade tenke hatudu progresu iha serbisu hodi nune’e bele fó oportunidade ba joven sira seluk.
“Imi na’in-hitu ne’ebé hetan oportunidade tenke hatudu komportamentu di’ak, automátikamente sei fó espasu ba ita-nia joven sira ne’ebé mak atu bá, sé imi na’in-hitu mak la hatudu komportamentu di’ak, signifika sei taka fali dalan ba ita-nia maluk sira ne’ebé mak atu bá serbisu iha Japaun,” governante ne’e tenik.
Serimónia despedida ne’e partisipa hosi Embaixadór Japaun iha Timor-Leste Titsuya Kimura, repezentante JICA, entidade Estadu seluk inklui família hosi traballadór sira.
Jornalista : Antónia Gusmão
Editora : Julia Chatarina
