DILI, 25 setembru 2023 (TATOLI)—Konstrusaun pediatria ho andar lima inklui Unidade Kuidadu Intensivu Kardiolojia (ICCU, sigla inglés) iha Hospitál Nasional Guido Valadares (HNGV) ho montante orsamentu hamutuk milaun $9.3, hafoin fatuk dahuluk, ohin, hatuur ai-riin, hodi hahú nia obra.
Tanba ne’e, Governu liuhusi Vise-Ministru ba Operasionalizasaun Ospitál iha Ministériu Saúde (MS), Flávio Brandão, ohin, hatuur ona ninia ai-riin, nu’udar kontinuasaun husi lansamentu fatuk-dahuluk ne’ebé hala’o ona iha janeiru liubá.
“Ohin, ita hatuur ona ai-rin. Tuun ona ba rai hatudu katak durante ita-nia komitmentu ne’ebé mak durante ita ko’alia iha 2014 no ohin ita konsegue hatuur ona ai-rin ba konstrusaun ne’e rasik nune’e ba futuru ita bele uza ba halo tratamentu ba ki’ik-oan sira,” Flávio Brandão dehan bainhira ramata hatuur ai-riin, iha HNGV, ohin.
Notísia relevante: https://tatoli.tl/2023/01/27/konstrusaun-pediatria-no-iccu-aloka-milaun-9-3-ba-durasaun-tinan-rua/
Governante ne’e hateten, ba oin sei servisu hamutuk ho kompaña China Civil Engineer Constrution Cooperation (CCECC) husi Xina, nune’e bele finaliza tuir tempu determinadu.
“Tuir planu sei finaliza iha 2025. Ita espera katak se bele di’ak liutan iha fulan-maiu 2025 ne’e ita bele iha ona ospitál foun ida ba pediatria no ICU,” nia espera.
Iha fatin hanesan, Diretór Jerál Unidade Projetu MS, Vitór Soares Martins, relembra, konstrusaun pediatria ho ICU ne’e tau fatuk dahuluk iha fulan-janeiru liubá, iha Governasaun anteriór no kontinua iha governasaun da-sia, oinsá bele harii ai-riin ho fundasaun nian.
“Prosesu ida ne’e ita dehan konsultasaun husi supervizór sira ne’ebé hetan kontratu husi MS depois iha kompaña vensedór ne’ebé manan ba obra ba iha bloku pediatra ho ICU nian entaun ninia orsamentu sira ne’e mai husi Orsamentu Jerál Estadu ne’ebé sei tau iha por anuál,” Vitor Soares Martins, afirma.
Notísia relevante: https://tatoli.tl/2023/03/28/ms-atualiza-progresu-konstrusaun-unidade-pediatria-hngv-ba-pm-taur/
Nune’e mós Xefe Enjinaria kompaña, China Civil Engineer Constrution Cooperation (CCECC), Cheng Liang, hateten ho ekipamentu sira ne’ebé mai husi Xina, Indonézia inklui Timor-Leste mak sei harii pediatria ida ne’e ho kualidade ba uza halo tratamentu labarik nian.
“Tuir kontratu ne’ebé Governu Timor-Leste fó, ami mak tuir abiliddae konfidénsia katak konstrusuan ne’e durasaun tinan rua: 2023-2025,” Cheng Liang garante.
Notísia relevante: https://tatoli.tl/2023/01/27/konstrusaun-pediatria-no-iccu-aloka-milaun-9-3-ba-durasaun-tinan-rua/
Jornalista: Felicidade Ximenes
Editór : Rafael Ximenes de A. Belo
