MALIANA, 05 outubru 2023 (TATOLI)-Sekretariadu Tékniku Administrasaun Eleitorál (STAE) munisípiu Bobonaro presiza karreta unidade 65 hodi transporta materiál eleisaun suku ba sentru votasaun 163.
Diretór STAE munisípiu Bobonaro, Mariano Viegas Amarál, informa, daudaun ne’e identifika ona karreta governu iha munisípiu Bobonaro no apoia hosi nasionál hamutuk 26.
Notísia relevante: STAE Bobonaro hahú rekruta PSAS-PSAA
“Ita presiza totál kareta ne’ebé atubele distribui materiál ba sentru votasaun iha 65, hosi númeru ne’e aldeia tolu presiza karreta ida, tanba ne’e ita presiza mós karreta aluger 40, ita sei koordena ho administradór postu sira, bele aluga direita iha povu atu kondutór sira hatene sira-nia situasaun no kondisaun estrada,” nia informa ba jornalista sira iha kna’ar fatin, kinta ne’e.
STAE Bobonaro mós identifika sentru votasaun 36 mak la asesu estrada, alende ne’e iha sentru votasaun hamutuk 42 mak la asesu enerjía elétrika.
“Ita hato’o ona pedidu ba Prezidente Autoridade Munisípiu nune’e bele enkamiña ba iha Institutu Jestaun Ekipamentu atubele normaliza estrada hirak-ne’e, kona-bá sentru votasaun la asesu eletrisidade informasaun foun ami rona sentru votasaun barak iha suku Gildapil, aldeia Atuas no Saburai asesu ona,” nia hatutan.
Mariano Viegas hatutan iha sentru votasaun hamutuk 40 mak laiha fatin ba edifísiu públiku sira hanesan eskola no sede aldeia.
“Ita presiza loke tenda, ha’u fó ezemplu de’it, iha suku Vila maibé sei iha fatin ne’ebé atu loke tenda hanesan suku Holsa, aldeia Bilicou no Loloa ho aldeia Taz, laiha edifísiu públiku, entaun ita-nia planu operasionál ne’e prevee orsamentu ba loke tenda nia,” Responsável STAE Bobonaro ne’e afirma.
STAE Bobonaro prontu apoia Autoridade Munisípiu Bobonaro no autoridade postu hodi implementa eleisaun lideransa komunitáriu no tempu badak sei hala’o formasaun ba autoridade lokál sira kompostu hosi xefe suku no xefe aldeia sira kona-bá lala’ok no prosesu eleisaun.
Notísia relevante: STAE Bobonaro ho líder lokál sira diskute preparasaun eleisaun suku
Jornalista: Sérgio da Cruz
Editór: Evaristo Soares Martins
