DILI, 12 outubru 2023(TATOLI)–Organizasaun Special Olympics Timor-Leste (SOTL), kinta ne’e, realiza atividade Youth Activation ka ativasaun foinsa’e hodi promove abilidade ema ho defisiénsia liuhosi interativa ko’alia no aprezentasaun dansa no pintura.
“Objetivu atividade ida ne’e atu envolve joven sira no ema ho defisiénsia bele sente konfiansa no seguru no sente livre hanesan mós ema joven sira seluk ne’ebe halo atividade iha aréa arte ho kultura no diálogu,” Prezidente SOTL, Maria Domingas Fernandes Alves “Mikato” iha otél Lúz Clarita, Lecidere Dili.
Responsavél ba SOTL ne’e hateten, antes realiza atividade ne’e, fulan tolu antes ekipa fó ona formasaun ba partisipante sira durante fulan-tolu.
“SOTL organiza atividade ba ema ho defiénsia hanesan yoga no halai atu ema ho defiénsia bele iha movimentu fízika,” Eis-Ministra Solidaridade Sosiál ne’e hatutan.
Mikato hateten ema ho defisiénsia iha kapasidade intelektuál atu sai mós lideransa, maske iha difikuldade fizika.
Iha fatin hanesan, Xefe Ekipa ba ema ho defisiénsia, Claudino Soares, haktuir, ekipa sempre akompaña partisipante sira atu oinsá kumpre regra, disiplina iha ezersísiu no ai-han atu hala’o atividade desportiva no seluktan.
“Ami servisu hamutuk iha fulan tolu, sira kumpre regra sira atu hala’o atividade boche oin sa atu soe bola,” nia hateten.
Jornalista: Jesuína Xavier
Editór: Agapito dos Santos
