VIQUEQUE, 16 outubru 2023 (TATOLI)—Administrasaun munisípiu Viqueque hetan ona pakote fiskál Orsamentu Jerál Estadu (OJE) tinan fiskál 2024 hosi Ministériu Finansa ho montante $5.228.236.
“Ami sei fó prioridade ba infraestura, edukasaun, saúde, turizmu no agrikultura,” Sekretáriu munisípiu Viqueque, Teotónio Sarmento da Silva, hateten ba Agência Tatoli, iha ninia knaar fatin, Administrasaun munisipál, segunda ne’e.
Notísia relevante : Munisípiu Viqueque kontinua tau prioridade ba fatin lixu
Nia dehan, munisípiu Viqueque iha tinan oin sei investe iha área turizmu hanesan guest house hodi bele hetan reseita.
“Governu tenke buka reseita atu nune’e ita-nia orsamentu labele mout de’it, nune’e presiza halo investimentu hodi halo dezenvolvimentu iha nasaun. Ita tau fundu ba setór turizmu sira iha munisípiu Viqueque atu dezenvolve,” nia hato’o.
Orsamentu ba Administrasaun Viqueque fahe ba kategoria Tuir saláriu no vensimentu $1.653.946, bens no servisu $566.421, kapitál menor laiha, kapitál dezenvolvimentu $ 525.060 no transferénsia públika $2.482.809.
Jornalista : Vitorino Lopes da Costa
Editora : Julia Chatarina
