DILI, 16 outubru 2023 (TATOLI) – Diretora Fundasaun CAUCUS, Teresinha Maria Cardoso, kongratula no fó parabéns ba jornalista sira iha Timor-Leste ne’ebé komemora loron nasionál liberdade imprensa, iha loron 16 outubru.
Iha komemorasaun loron nasionál liberdade imprensa dahuluk ne’ebé realiza iha postu administrativu Balibo ho tema “Liberdade Imprensa kontribui ba demokrasia dignu”.
“Parabéns loron ba media sira, selebra ita bo’ot sira nia loron espera media bele foti isu maka’as kona-ba feto ba iha ita nia sosiedade, buka feto potensiál no kapasidade sira nia lideransa no politika ne’ebé hola parte iha prosesu demokrásia liuliu sira ne’ebé kandidata-aan ba xefe suku”, Diretora ne’e hateten iha studio Agéncia TATOLI, Faról-Dili.
Diretora CAUCUS ne’e mós husu ba jornalista sira atu promove no hola profil ba feto pontesiál ka prestasaun sira sira iha área polítika,ekonomia no seluk
“Atu sai figura no modelu ne’ebé di’ak ba feto foinsa’e sira hodi banati tuir hodi kontribui ba prosesu dezenvolvimentu nasionál ho demokrátiku, saudavel no seguru”, nia konklui.
Komemorasaun ne’e bazea ba aprovasaun projetu rezolusaun Parlamentu Naisionál númeru 95/V(4a) ne’ebé aprezenta hosi Konsellu Imprensa, nune’e institui loron nasionál Liberdade Imprensa iha loron 16 outubru nune’e kada tinan selebra.
Jornalista na’in-lima (5) ne’ebé mate iha trajédia “Balibo Five” ne’e mak hanesan; Greg Shackleton (reportér) ho idade 29, Tony Stewart (gravadór lian) ho idade 21, Gary Cunningham (cameraman) hosi mídia HSV-7 (Seven Network) Melbourne ho idade 27, Brian Peters (camera man) ho idade 26 no Malcolm Rennie (reportér) hosi mídia TCN-9 (Nine Network) Sydney ho idade 29.
Jornalista na’in lima ne’e fó kontribuisaun ne’ebé bele loke mundu internasionál nia matan atu haree sofrimentu ne’ebé povu Timor-Leste hasoru.
Notísia relevante: Trajédia Balibo Five garante liberdade imprensa iha Timor-Leste
.Jornalista : Jesuína Xavier
Editor : Florencio Miranda Ximenes
