DILI, 18 outubru 2023 (TATOLI) – Diretora Asosiasaun Esperansa, Madalena da Costa, hateten, kontinua firme hodi fó asisténsia judisiáriu no advokasia labarik feto no feto ho defisiénsia, ne’ebé hetan violasaun no agresaun fizíku iha família no ema seluk.
“Ami nia atividade ha’at hanesan fó assiténsia justisa no advokasia ba labraik feto no feto ho defisiénsia, kapasitasaun no kooperativa. Iha tinan rua ne’e, ami foka liu ba fó asistensia justisa no advokasia liuhusi servisu hamutuk ho AlFela hodi hetan justisa legál ba vítima ema ho defisiénsia”, dehan Diretora ne’e ba Agência TATOLI, iha kna’ar fatin-Dili.
Iha fulan ne’e, nia dehan ema ho defisiénsia na’in-ha’at mak hetan violasaun no agressaun fíziku iha família ne’ebé asosiasaun fó asisténsia tuir prosesu legal.
“Ita akompaña prosesu ne’e to’o ona iha Ministériu Públiku, maibé na’in-rua deside dada hikas nia kazu atu rezolve tuir dalan familia,” dehan Diretora ne’e ba Agência TATOLI, iha kna’ar fatin-Dili.
Ho kazu sira ne’e, nia dehan kontinua servisu hamutuk Alfela, Uma Mahon no autoridade Polisiál atu akompaña prosesu justisa ba ema ho defisiénsia.
Asosiasaun Esperansa mós hudu ema hotu atu apoia ema ho defisiénsia bainhira hetan agresaun no violasaun atu aprenzenta kazu sira ne’e ba autoridade kompetente hodi prosesa tuir lei.
Atividade asosiasaun kona-ba asisténsia no advokásia ba labarik feto no feto ho defisiénsia hetan apoio husi parseiru Nova Zelándia ho montante $5.200
Notísia relevante: Asosiasaun Esperansa husu Agência TATOLI habelar EhD nia lian ba públiku
Jornalista: Jesuína Xavier
Editora : Florencio Miranda Ximenes
