DILI, 24 outubru 2023 (TATOLI)—Membru Parlamentu Nasionál (PN) liuhosi Deputadu PLP, Helder Freitas Camarudi, preokupa ho verifikasaun dadus antigu kombatente veteranu rejistadu 2009 ne’ebé la’o hela iha munisípiu sira.
Notísia Relevante: Verifikasaun dadus veteranu rejistadu 2009 kontinua hikas iha 28 setembru
“Ha’u iha pontu importante balun, simu lamentasaun kona-ba verifikasaun antigu kombatente veteranu ne’ebé la’o hela iha munisípiu sira, balun hetan rekomendasaun no balun la hetan rekomendasaun. Tanba sira-ne’ebé rejistu iha tinan 2003 no 2005 bele hetan rekomendasaun (grau) 8-14, 15-19, 20-14, maibé sira ne’ebé rejistu iha 2009 la hetan rekomendasaun. Diferente ne’e iha ne’ebé,” Deputadu ne’e levanta liuhosi reuniaun plenária PN, tersa ne’e.
Tanba, nia hateten, lei inan artigu 11 fó valór ba rezisténsia no realidade akontese iha rejistu uluk iha 2003 ho 2005 hetan rekomendasaun, maibé ida ikus 2009 nian la hetan rekomendasaun ne’e hanesan halo diskriminasaun boot.
Karik iha 2009 nian identifikasaun tuir lei antigu kombatente veteranu, entaun 2003 ho 2005 tenke halo re-verifikasaun tanba 2003 ho 2005 ne’e halo dokumentu falsu, entaun ema barak 500-ital mak halo dokumentu falsu sai kombatente no veteranu ne’e ninia iha prosesu to’o ona iha ne’ebé.
Tanba ne’e, nia husu ba Ministru Asuntu Kombatente Libertasaun Nasionál (MACLN, sigla postugés), Gil da Costa Monteiro “Oan Soru”, atu toma atensaun.
Deputadu hosi bankada opozisaun ne’e foti mós preokupasaun hosi frente armada ne’ebé hetan indikasaun grau 15-19 no 20-24 balun hetan ona apoiu hosi Estadu hodi halo konstrusaun uma ba sira balun la’o di’ak, maibé balun hetan problema kona-ba rai ne’ebé atu halo konstrusaun sei iha prosesu nia laran, nune’e husu ministéiru tutela atu nafatin akompaña prosesu sira-ne’e.
Nia rekomenda ba XI Governu atu frente klandestina ho grau 8-14 no 15-19 ne’ebé idade avansadu ona karik iha proposta Orsamentu Jerál Estadu (OJE) 2024 mai bele tau mós prioridade konstrusaun uma ba sira.
Deputadu CNRT, Duarte Nunes, hateten kona-ba verifkasaun dadus antigu kombatente antes ne’e nia-parte foti mós kestaun ne’e.
“Ne’e antes ita atu halo eleisaun, ha’u foti ona maibé iha momentu ne’eba ema lakohi rona, tanba interese balun mós iha. Komisaun ne’ebé halo verifikasaun ne’e kauza kór ida de’it, entaun sira seluk sente ita dehan prezudikadu. Tanba, kuandu hatais kór seluk ema ba tenta ajuda de’it, ida ne’e iha munisípiu Lautém,” nia hateten,
Nune’e, Deputadu hosi bankada Governu ne’e espera konsellu veteranu ka ministériu tutela bele forma ekipa ida haree fila-fali situasaun ne’ebé mosu liu ba.
Vise Ministru ba asuntu Parlamentár, Aderito Hugo da Costa, hateten verifikasaun ba dadus rejista iha tinan 2009 nian ba daudaun konsellu veteranu halo hela iha terrenu hodi prienxe sira-nia kalendáriu serbisu liuliu verfikasaun, tanba IX Governu hakarak verifikasaun tenke termina iha fulan dezembru tinan ne’e, nune’e tinan oin bele halo pagamentu.
Hafoin ne’e, nia dehan, tinan oin bele hahú mós posibilidade reabertura ba rejistu ba sira-ne’ebé la konsege rejistu iha períodu 2003 no 2009 no ba sira-ne’ebé dadus la kompletu iha períodu nia laran.
Nia mós husu Deptuadu sira atu hato’o pedidu ba ministru tutela hodi halo sesaun debate espesiál hodi bele esplika dala ida de’it kona-ba asuntu veteranu nian.
Jornalista : Nelson de Sousa
Editór : Cancio Ximenes
