OÉ-CUSSE 31 outubru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretáriu Rejionál ba Asuntu Komérsiu no Indústria, aloka $306,226.94 hosi Orsamentu Jerál Estadu (OJE) 2023 hodi reabilita merkadu tradisionál Pune iha suku Usitasa’e, sub-rejiaun Oésilo.
Notísia relevante:RAEOA aloka rihun $57-resin konstrui merkadu tradisionál Baoknana
Sekretáriu Rejionál ba Asuntu Komérsiu no Indústria, Pedro da Silva Boquifai, hateten, antes ne’e ekipa tékniku identifika ona no promove diskusaun ho autoridade lokál sira iha suku Usitasa’e, presiza atu hadi’a, nune’e fasilita negosiante sira.
“Merkadu ita reabilita hodi aumenta-tán fasilidade foun tanba merkadu ne’e sentru ida entre sub-rejiaun Nítibe, Oésilo no Pássabe, entaun ita tenke prepara fasilidade dignu atu fasilita negosiante fa’an sasán ho kondisaun saudável,” Pedro da Silva Boquifai, ba Agência Tatoli iha Oé-Cusse, tersa ne’e.
Tuir nia, fasilidade ne’ebé harii, hanesan uma ba negosiante sira atu hela, depois parte Autoridade kontinua deskuti ho sira ba futuru bele kontribui taxa ba kofre Estadu, no sei aumenta-tán uma públiku rua-tán ba inan-aman sira faan modo, hirak-ne’ebé faan nesesidade bázika sei halo ketak fatin ida.
“Agora iha uma rua, maibé uma ida oin ne’e sei hasai tiha atu harii fali foun iha kotuk, sira faan nesesidade bázika ita sei harii fali iha parte sorin liga ba Noetoko nian, tanba sede suku ne’e sei muda ba fatin seluk, tanba kona-bá fatin konkorda ona ho autoridade lokál sira iha Usitasa’e atu muda,” nia informa.
Nia hateten, kona-bá planu atu bainhira mak hatuur fatuk dahuluk, seidauk termina kaléndariu tanba rezultadu tenderizasaun foin públika iha semana kotuk, nune’e hosi aprovizionamentu sei fó tempu loron lima.
Nune’e durante loron lima nia laran, karik laiha reklamasaun mak foin bele selebra kontratu ho kompañia atu hahú ezekuta, tanba daudaun ne’e kompañia manán na’in mak Elo Manu Beno Uunipesoál Lda.
“Fasilidade ne’ebé harii iha merkadu ne’e la’os uma de’it maibé pakote, hanesan sanitaria, fatin soe lizu, postu seguránsa no postu jestór merkadu sira-nian, inklui fasilidade bee-moos,” nia katak.
Xefe suku Uistasa’e, Tomas Ulan Colo, agradese ba Autoridade RAEOA, tanba merkadu Pune, nu’udar sentru dezde seidauk ukun-an, akumula komérsiánte sira mai hosi sub-rejiaun tolu, Nítibe sorin, Oésilo no sub-rejiaun Pássabe.
“Antes parte Autoridade liuhosi komérsiu mai identifika atu hadi’a, ne’e mak agora rezultadu tenderizasaun públika ona, ita agradese, espera iha tempu badak bele hadi’a, nune’e bele tulun ita-nia negosiánte sira bele faan sasán ho di’ak,” nia orgullu.
Entretantu, merkadu tradisionál Pune lokaliza iha aldeia Pune suku Usitasa’e sub-rejiaun Oésilo, no merkadu ne’e hala’o atividade bazar kada semana akontese iha loron kinta.
Notísia relevante: RAEOA propoin millaun $93 iha tetu OJE 2024 atu konklui projetu 99
Jornalista: Abílio Elo Nini
Editór: Evaristo Soares Martins
