DILI, 06 novembru 2023 (TATOLI) – Governu Austrália liuhosi Departamentu Negósiu Estranjeiru no Komersiu (DFAT) apoiu ekipmentu médiku ho item 15 ba Servisu Nasionál Apoiu Emerjénsia Médika (SNAEM.IP) hodi utiliza iha karreta ambulánsia bainhira tula pasiente sira.
“Ekipamentu médiku sira ne’ebé mak ami apoiu ne’e ita boot sira utiliza didiak iha kareta ambulánsia laran bainhira ita-nia populasaun sira moras hanesan hetan dezastre entaun ita tenke tulun lalais ho ekipamentu sira ne’e hafoin to’o iha fasilidade saúde”, Jestór Parseria Nutrisaun iha DFAT Antoninho Perreira informa iha SNAEMIP Caicoli, ohin.
Ekipamentu ne’ebé mak ohin apoia mak pasta ba primeiru sokoru, kompressor Nebuliser, Monitor no automated external defibrillator (AED).
Nia dehan, Governu Austrália mantein kompromisiu liu hosi apoiu ne’ebé mak iha, espera katak ho servisu hamutuk ho SNAEM bele di’ak liután iha futuru.
“Ami nafatin iha kompromisiu katak ba oin suporta nafatin, tanba ne’e espera katak ita-nia servisu hamutuk ne’e ba futuru sai di’ak liután”, nia afirma.
Iha fatin hanesan, Diretór SNAEM,I.P, Horacio Sarmento agradese ba Governu Austrália liuhosi DFAT ne’ebé apoiu ekipamentu médiku ba SNAEM atu utiliza iha kareta ambulánsia bainhira tula pasiente sira.
“Durante parseiru sira apoiu hanesan asesoria mekánika, apoiu dezenvolvimentu estratéjiku SNAEM.IP, matadalan prátika klínika no ekipamentu médiku, entaun ha’u haree katak banhira ambulánsia sira tula pasiente maibé ekipamentu sira la iha laran, entaun ekipa sira labele halo buat ida”, Horacio Sarmento informa.
Nia afirma, ekipamentu sira ne’e importante iha ambulánsia laran atu salva lalais vida bázika no avansadu, entaun durante ne’e ekipamentu sira ne’e la iha ambulánsia laran tanba orsamentu ne’ebé aloka ba SNAEMIP la sufisiente atu sosa, entaun iha tinan ne’e SNAEM iha planu atu hola.
“Ekipamentu ne’ebé mak apoiu ne’e ita sei utiliza iha ambulánsia sentrál Comoro no Becora”, nia hateten.
Jornalista : Felicidade Ximenes
Editór : Zezito Silva
