DILI, 08 novembru 2023 (TATOLI) – Igreja Katólika no Igreja Protestante iha Timor-Leste husu ba joven sira atu hadomi malu, kria fraternidade iha sosiedade hodi hakribi violénsia atu atu garante pás no estabilidade rai laran.
“Ha’u Nia mensajem joven sira iha Rai doben Timor Leste tenke kria unidade, Fraternidade hodi fó kontribui prosesu dezenvolvimentu Nasionál”, hatete Pastór iha Igreja Protestante Hosana, Lorenço dos Santos, iha Vila Verde ba Tatoli.
Notísia relevante: Xanana husu grupu joven sira hadomi malu
Pastór mós husu ba foinsa’e sira tenke estuda maka’as no aprende buat barak hodi respeita malu, labele hanoin aat ba malu atu nune’e inimigu ba malu no oho malu labele akontese iha sosiedade. Tanba joven mak sai futuru, familia, Igreja no nasaun nian.
Iha fatin ketak, Madre Guilhermina Marçal husu mós ba joven sira tenke hametin unidade hodi fó kontribuisaun ba dezenvolvimentu rai-laran. Tanba joven mak sai futuru ba nasaun nian.
“Joven sira tenke buka hadomi malu, rona malu, tulun malu hodi serbisu hamutuk hodi garante pás no estabilidade”, Madre fó hanoin.
Joven-sira iha reponsabilidade boot ba future nasaun nian, nune’e ema hotu-hotu tau laran metin ba joven sira.
“Loron ida aban hahú ohin, se joven sira la rona malu, destroe malu no halo desturbiu bele halakon pás iha uma laran no bairru-laran, baimhira loos mak ita hakmatek no bainhira mak dezenvolve ita nia rai bele iha”, katak.
Tanba ne’e, Madre enkoraja joven sira atu husik ba kotuk hahalok aat sira atu sai joven konstrutor ba dame iha nia nasaun-laran.
“Foinsa’e laos tuir idak-idak nia organizaun ka kor. Organizasaun bele iha oi-oin, maibé iha misaun no vizaun ba ida de’it mak unidade hodi kontribui ba dezenvolvimentu nasionál. Se joven lakohi hamutuk, bainhira loos?”.
Notísia relevante: PNTL Apela ba Juventude Hakribi Ona Violénsia
Jornalista: Jesuína Xavier
Editór : Florencio Miranda Ximenes
