DILI, 09 novembru 2023 (TATOLI) –Insitutu Nasionál Seguransa Sosiál (INSS) ezekuta ona 52% husi orsamentu alokadu hamutuk millaun $82-resin ba tinan 2023.
Prezidente INSS, Longuinhos Armando Leite, informa iha finál novembru ne’e sei selu empreza sira ne’ebé halo akizisaun ba ekipamentu sira, nune’e ezekusaun bele atinje 95%.
“Osan ne’ebé ami simu ba kategória lima nian ne’e hamutuk liu millaun $82. Ami ezekuta ona millaun $39 no saldo hela $42-resin”, Longuinhos Leite dehan ba Tatoli, ohin.
Ba saláriu no vensimentu atinje ona 60% hosi totál millaun $1 no saldo hela rihun $500-resin, ba bens no servisu ezekuta ona 3% hosi millaun $2,8 no hela millaun $2-resin.
“Ezekuta ona rihun $80, maibé prosesu aprovizionamentu la’o hotu ona no kompañia halo hela kompras, nune’e hein pedidu hosi sira depois hotu mak halo pagamentu de’it tanba halo ona kompromisu. Ita-nian ezekusaun ida ne’e ki’ik loos tanba prosesu aprovizionamentu mak tarde”, esplika.
Ba kapitál menór ezekuta ona 41% ka rihun $137 hosi totál rihun $337 no transferénsia públika iha millaun $77 no ezekuta ona 50%.
“Osan ida ne’e selu ba pensaun sosiál nian ne’ebé sorin selu ona ba faze dahuluk nian no sorin hein faze daruak implementa iha novembru ne’e. Ezekusaun ne’e ita sei atinje to’o 95%, tanba ita sei selu tan fulan rua nian inklui désimu treseiru ba funsionáriu sira INSS nian”, realsa.
Notísia relevante: INSS simu tetu orsamentu hosi MF millaun $83
Jornalista: Osória Marques
Editora: Maria Auxiliadora
