DILI 09 novembru 2023 (TATOLI) – Ministériu Juventude Desporto Arte no Cultura (MJDAK), Nélio Isaac Sarmento halo abertura ba atividade konsulta masál hodi komemora loron nasionál juventude ba dala 18 no Masakre Santa Cruz ba dala 32.
“Konsulta masál ne’e la’os de’it lembra no halo kurativu ba sobrevivente 12 Novembru sira nian, maibé atu fó mós mensajen ba ema hothotu katak tempu to’o ona ita tenke kuidadu ita nia aan rasik hodi garante sustentabilidade nasaun nian”, Ministru Nélio dehan bainhira hala’o abertura ba konsulta masál ne’ebé realiza iha resintu MJDAK, Lecidere, ohin.
Governante ne’e apresia ba atividade sira ne’ebé organiza hosi jerasaun 12 Novembru nian hodi tulun malu liuhosi fó hanoin ba malu kona-ba importánsia isin diak ba ema nia moris.
“Agradese espesiál liu ba ha’u nia oan sira liuhosi jerasaun 12 Novembru ne’ebé realiza atividade ida ne’e, iha ámbitu, halo reflesaun ba masakre 12 Novembru no mós selebra loron nasionál ba juventude nian. Ita hamutuk fó hanoin ba malu katak saúde ne’e importante ba ita-nia moris”, ministru ne’e hatete.
Ministru orgullu tanba entre médiku sira ne’ebé mak fó asisténsia iha konsulta masál ne’e mai husi sobrevivente 12 Novembru nia-oan sira rasik.
“Dala ida-tan, husu ba hothotu sente, tanba doutor sira iha ne’e atu fó asisténsia saúde ba ita, sente katak buat ruma sofre karik mai hakbesik ba”, ministru dehan.
Atividade konsulta masál ne’e mak hanesan terapi husi Rai Mor no konsulta saúde jerál, matan no doasaun ran ne’ebé atende hosi médiku Hospitál Nasionál Guido Valadares Dili.
Ativiade ne’e hala’o durante loron tolu, hahú ohin 09-11 novembru 2023.
Jornalista: Hortencio Sanchez
Editór : Zezito Silva
