DILI, 09 novembru 2023 (TATOLI) – Reabilitasaun jardin matak iha Timor Lodge, iha avenida Prezidente Nicolau Lobato, ne’ebé halo husi empreza ASET atinje ona 42%.
Diretór empreza ASET, Augusto Soares, haktuir katak reabilitasaun jardín ne’e konstrui ona abrigu ka shelter, monta pavimentu, kuda ai-horis, monta fatuk korál no kontinua instala eletrisidade no kanalizasaun bee iha jardín ne’ebé komunidade lahela ka iha espasu livre.
“Fatin livre sira ne’e maka ita konstroi ona no agora konsege atinje ona númeru persentajen ne’ebé iha”, dehan ba Tatoli iha edifísiu empreza ASET, Hudi-laran, ohin.
Daudaun ne’e kompañia hasai uma-kain sia no agora traballadór sira komesa hamoos fatin ne’ebé uluk komunidade sira hela atu hahú reabilita.
“Ita foin mak hasai tan família sia iha jardín laran ne’e, entaun ita presiza tempu atu didin hale’u tiha depois maka ita foin kontinua halo obra. Ne’e duni, husi parte loromonu nian ita seidauk book buat ida”, esplika.
Tanba laiha ona komunidade mak hela iha laran maka kompañia garante husi dezembru tinan ne’e ba oin sira bele aselera prosesu hotu hodi bele konklui konstrusaun no reabilitasaun ba jardín refere.
Jardín ho naruk metru 240 ne’ebé Governu fó fiar ba ASET hodi konstroi sai jardín verde ne’e prevee ona osan ho montante $269.923.38.
Notísia relevante: Reabilitasaun jardin matak iha Timor Logde oin seidauk finaliza
Jornalista: Tomé Amado
Editora: Maria Auxiliadora
