DILI, 14 novembru 2023 (TATOLI)—Membru Parlamentu Nasionál (PN) liuhosi Xefe bankada PLP, Deputada Maria Angelina Sarmento, kontinua preokupa ho folin foos sae iha merkadu.
Notísia Relevante: AIFAESA foti ona amostra foos marka “Amor de Familia” bá teste kualidade
“Hakarak levanta kestaun kona-ba presu foos, embora ita halo ona interpelasaun no Governu mai halo ona esplikasaun maibé realidade bainhira ami ba supermerkadu balun hatudu presu foos seidauk normaliza. Subsídiu ne’ebé ita tau, ezemplu, foos Folson kilograma 20 nia presu to’o agora sei $18, Globus kilograma 25 ho presu $19,050 sentavu, foos Amor da Família ne’e nia presu $11 no $12,” nia levanta liuhosi reuniaun plenária PN, tersa ne’e.
Maibé, nia dehan, saida mak Ministru Komersiu no Indústria (MKI) ho nia vise mai esplika iha PN la fó esperansa katak intervensaun subsídiu ba empreza importadór sira-ne’e sei ajuda atu normaliza presu foos.
“Realidade foos ne’ebé ha’u hateten ne’e, nia presu sei nafatin. Bainhira tama iha ne’eba, populasaun sira hakfodak tanba folin foos seidauk tun. PN dehan tau ona osan subsídiu millaun $4 ba kompañia sira mak foos folin seidauk tun ka normaliza ne’e. Agora foos Amor da Família ami ko’alia iha ne’e, realidade ha’u mós sosa no tein foos ida-ne’e,” nia dehan.
Foos marka Amor da Família ne’e, bainra tein ne’e tau bee barak mós nia la dodok no nia tasak namkari hanesan rai henek loos no atu tau bee uitoan mós nia tasak hanesan tau bee barak.
Foos Amor da Família ne’e, koko tein mós bainhira tasak ne’e nia la mutin hanesan foos sira seluk, no bganhira han ne’e ninia sabór sente hanesan raihenek namkari iha ibun laran,” nia dehan.
Ne’ebé, nia hateten, lahatene foos ne’e parese muda de’it foos balun ne’ebé kualidade ladi’ak troka de’it nia saka karik, nune’e Governu tenke haree didi’ak kestaun sira-ne’e.
Parte PN husu interven iha presu foos maibé mós tenke haree ninia kualidade foos, tanba povu mak konsumu.
Xefe bankada CNRT, Deputadu Duarte Nunes, hateten preokupasaun kona-ba foos nia-parte konkorda nune’e ba membru Governu responsável atu tau atensaun.
Notísia Relevante: Governu koordena empreza importadór normaliza presu foos
Jornalista : Nelson de Sousa
Editór : Cancio Ximenes
