BAUCAU, 14 novembru 2023 (TATOLI) – Mosu konfrontu iha fatin tolu durante kontajen votu iha munisípiu Baucau tanba maioria kondisaun lanu no mosu provokasaun.
Komandante Polísia Nasionál Timor-Leste (PNTL) munisípiu Baucau, Superintendente Xefe Antoninho Mauluta, esplika, fatin tolu refere iha suku Gariuai, postu Baucau Vila, suku Samalari, postu Baguia no atake entre joven iha suku Laisorulai, postu Quelicai ho Samalari, postu Baucau Vila.
“Prosesu votasaun situasaun la’o normál maibé prosesu kontajen mak akontese mosu konfrontu sira-ne’e,” Komandante PNTL Baucau hateten iha Vila Nova, tersa ne’e.
Mesmu nune’e, situasaun siguransa iha fatin akontesementu la’o normÁl hikas tanba komandu PNTL Baucau depois rona informasaun direitamente oreinta kedas membru destakadu halo atuasaun hanesan prevene konfrontu hirak-ne’e.
Iha Gariuai, postu Baucau Vila akontese tanba joven sira kondisaun lanu halo atake ba malu inklui tuda membru PNTL balun nune’e rezulta joven ida hetan tiru hosi membru Polísia.
Enkuantu iha suku Samalari, postu Baucau Vila akontese hanesan tanba kondisaun lanu no kontinua to’o ohin dadeer envolve tán joven balun hosi suku Laisorulai, postu Quelicai.
Enkuantu suku Samalari, postu Baguia, kandidatura xefe suku sesante deskontenti ho rezultadu apuramentu nune’e apoiante halo provokasaun hodi hamosu konfrontu entre joven sira iha fatin akontesementu.
Komandu PNTL Baucau orienta ona eskuadra Baguia atu identifika no halo investigasaun hanesan sasán ne’ebé estragu inklui vítima sira-ne’ebé hetan kanek iha konfruntu suku Samalari, postu Baguia nian.
Hosi kazu Samalari, postu Baguia rezulta vítima ida hetan kanek tanba tá iha liman no uma haat hetan estragu.
PNTL Baucau rasik antes ne’e iha ona informasaun sei akontese konfrontu iha Gariuai tanba apoiante kandidatura xefe suku balun mobiliza malu hemu tua maibé ikus mai kontinua akontese.
“Polísia task force inklui BOP atuál iha terrenu atu halo prevensaun ba situsaun sira-ne’e,” Superintendente Xefe Antoninho Mauluta akresenta.
PNTL Baucau konsidera kazu hirak-ne’e grave nune’e sei kontinua prosesu identifikasaun no rekolla evidénsia hanesan sasán no sasin sira hodi halo investigasaun antes kontinua ba Ministériu Publiku Baucau.
Jornalista : Natalino Belo
Editór : Evaristo Soares Martins
