VIQUEQUE, 16 novembru 2023 (TATOLI)- Iha tinan 2023 ne’e, Grupu komunitária no Organizasaun Naun Governamentál (ONG) hetan apoiu husi Serbisu Apoia Sosiedade Sívil (SASCAS), implementa atividade multi-setorál iha munisípiu Viqueque.
“SASCAS fó apoia fundu ba organizasaun komunitária no ONG hamutuk 14. Sira implementa atividade multi-setorál ne’ebé kria formasaun ba grupu sira. Apoia sira-ne’ebé SASCAS fó ne’e hosi tinan 2023 nian nune’e ami halo monitoriza ba organizasaun 14, ninia atividade hotu implementa iha Viqueque kuaze la’o di’ak”, Jestora Suvensaun públika, Nori Maria Soares, hateten ba Agência Tatoli, Postu Uatulari, kinta ne’e.
Tanba ne’e nia dehan, SACAS mai Viqueque hodi halo supervizasaun direta ba atividade grupu benifisiáriu sira implementa ona hanesan Timor Vizon halo atividade fahi-luhan no Bibi-luhan. Sira hahú hatama ona fahi no Bibi. Grupu Raka Solo iha suku Babulo, postu Uatulari, kria haris-fatin ba kbiit-la’ek sira.
“Fundu ba grupu 14 ne’e, ami labele ajusta tanba ida-ne’e tranferénsia dauluk 40% ba kada organizasaun benifísiariu sira ne’ebé la hanesan. Maibé, apoia ba Fundasaun Knua Habera Komunidade (KHK) SASCAS prevee $15 mil hodi kria formasaun ba grupu tolu ne’ebé KHK rejista ona. Enkuantu, grupu Ai-malae, suku Uma Tolu, postu Lacluta haki’ak karau hetan fundu hosi SASCAS hamutuk $5.000, grupu ba benifísiariu sira seluk ami labele fó sai sira nian orsamentu detallu,” jestora ne’e hato’o.
Kona-ba asesu fundu hosi SASCAS, nia dehan, fundu SASCAS nian tinan ida-ne’e halo sosializasaun nune’e fundu ida-ne’e sei loke fila tinan 2024 tanba fundu hosi SASCAS nian tinan ida simu proposta dala ida.
“Apoia fundu hosi SASCAS nian tinan ida ami loke dala no ami mós halo ona sosializasaun ba abitante sira oinsá asesu ba fundu ida-ne’e; ninia kritériu hosi SASCAS. Maibé, tinan ida ami loke dala ida nune’e ami sei simu fila fali proposta iha tinan 2024,” nia tenik.
Notísia relevante: Fundu SASCAS apoia ona atividade ekonomia-edukasaun iha Oé-Cusse
Jornalista : Vitorino Loeps da Costa
Editór : Rafael Ximenes de A. Belo
