VIQUEQUE, 17 novembru 2023 (TATOLI)—Ministériu Agrikultura, Pekuária, Peska no Floresta (MAPPF) loke ona prosesu ba manutensaun tratór boot ne’ebé destaka iha munisípiu sira hodi ajuda agrikultór halo atividade.
“Iha fulan kotuk ha’u hasai despaixu no forma ekipa mekániku ida hosi ministériu hodi halo leventamentu tratór boot sira iha munisípiu hotu-hotu no identifika ona tratór boot sira. Nune’e tratór boot ami tau ona orsamentu hodi hadi’a, ne’ebé daudaun prosesu sei la’o hela,” Ministru Agrikultura, Pekuária, Peska no Floresta, Marcos da Cruz, informa iha Ailenbata, suku Babulu, postu Uatulari, sesta ne’e.
Notísia relevante : Servisu Agrikultura Viqueque prefere halo manutensaun tratór boot 26
MAPPF tau ona orsamentu tinan 2024 nian hodi halo manutensaun tratór boot hamutuk 300 ne’ebé antes ne’e distribui iha tinan 2008, 2009 no 2010.
“Ami labele hadi’a tanba ita atu hadi’a kustu boot liu, ne’ebé metade hosi númeru 300 ne’e mekániku sira halo ona identifika hodi halo manutensaun no ami tau hela ba atensaun daudaun prosesu hela. Ha’u espera iha fulan-oin tratór boot sira-ne’e bele iha kondisaun di’ak hodi apoia operasaun fila rai iha territóriu tomak,” nia akresenta.
Aleinde ne’e, MAPPF planeia ho orsamentu 2023 atu sosa tratór boot.
“Ami loke ona konkursu atu sosa tan tratór boot hamutuk unidade 25 iha fulan-novembru nia laran. Ha’u sei asina kontratu ho empraza manán-na’in, tratór boot foun 25 ne’e sei reforsa serbisu iha terrenu. Tratór boot sira ne’e sei koloka iha irrigasaun boot sira iha territóriu hodi fasilita povu agrikultór sira iha kampu,” Ministru otimista.
Antes ne’e, Diretór Servisu Agrikultura Viqueque, Fernando Joaquim, sujere MAPPF halo manutensaun ba tratór boot 26 ne’ebé destaka iha munisipiu Viqueque.
“Iha Viqueque ami simu proposta hosi povu agrikultór sira, husu atu fila sira-nia rai, maibé ita-nia tratór boot ho kondisaun a’at. Nune’e, ami rekomenda ba ministériu hodi halo manutensaun ba tratór boot 26 hodi bele ajuda povu agrikultór Viqueque hasa’e produsaun ai-han rai-laran,” nia tenik.
Tuir dadus hosi Servisu Agrikultura Viqueque, tratór boot hamutuk unidade 39 daudaun ne’e iha Viqueque, kompostu hosi tratór boot lima ho kondisaun di‘ak, tratór ho kondisaun a’at naton 17 no a’at totál 17.
Jornalista : Vitorino Lopes da Costa
Editora : Julia Chatarina
