DILI, 21 novembru 2023 (TATOLI)—Prezidente Parlamentu Nasionál (PPN), Maria Fernanda Lay, tersa ne’e, simu vizita hosi Sekretáriu Ezekutivu Komunidade Nasaun Ko’alia Lian Portugés (CPLP, siglá portugés), Zacarias Albano da Costa, hodi diksute kona-ba haforsa implementasaun língua portugeza iha eskola sira iha Timor-Leste.
Sekretáriu Ezekutivu CPLP, Zacarias da Costa, hateten nia-parte hala’o enkontru dahuluk ne’e nu’udar vizita ofisiál dezde Governu foun toma pose naturalmente hahú kedas ho PPN, no durante sorumutu ko’alia kona-ba kestaun barak mak agradese prezensa PPN iha simeira CPLP ne’ebé foin daudaun realiza iha fulan-agostu tinan ne’e iha São Tome e Princípe hodi reprezenta Prezidente Repúblika.
Iha biban ne’e, kestaun barak asembleia parlamentár CPLP nian ne’ebé Parlamentu Nasionál TL partisipa iha ne’eba, oinsá mak bele haforsa tan partisipasaun Parlamentu Nasionál ka Deputadu TL iha asembleia Parlamentu CPLP nian.
“Ko’alia mós apoiu ne’ebé importante no nesesáriu Timor-Leste fó mós ba CPLP liuhosi sekretariadu partikularmente iha tempu ida sekretáriu ezekutivu timoroan ida. Depois ami ko’alia kona-ba oinsá mak língua portugeza bele mós implementa iha Timor-Leste iha eskola sira, oinsá mak CPLP ajuda Timor-Leste atu bele halo forsa liután prezensa língua portugeza iha Timor, no ami haree ba kestaun sira seluk ne’ebé importante iha ajenda atuál,” nia hateten ba jornalista sira hafoin ramata enkontru iha uma fukun PN.
Durante sorumutu, nia dehan, PPN hato’o katak PN pertense mós ba órgaun ida iha CPLP naran asembleia parlamentár CPLP, no iha asembleia ne’e órgaun ida CPLP nian ne’ebé importante tebe-tebes tanba Parlamentu Nasionál hotu-hotu mak tuur iha ne’eba no sira haree ba desizaun ne’ebé hala’o ba vida organizasaun nian.
“No, ohin ami hare kona-ba ida-ne’e oinsá mak Parlamentu Nasionál Timor-Leste bele apoiu liutan finanseiru, nune’e órgaun CPLP sira-ne’e bele la’o ba oin,” nia dehan.
Jornalista : Nelson de Sousa
Editór : Cancio Ximenes
