DILI, 24 novembru 2023 (TATOLI) – Vise Primeiru-Ministru no Ministru Koordenadór Asuntu Ekónomika no Ministru Turizmu Ambiente, Francisco Kalbuadi Lay, agradese ba Prezidente Repúblika José Ramos Horta no Primeiru Ministru Kay Rala Xanana Gusmão ne’ebé apoiu másimu ba atividade Forum Internasional Business ho susesu ne’ebé la’o iha Timor-Leste.
“Agradese tebes ba apoiu ita-nia Prezidente Repúblika José Ramos Horta no Xefe Governu maun boot Kay Rala Xanana Gusmão tanba sira nia apoiu ita realiza atividade ida-ne’e la’o ho susesu tebes”, Kalbuadi hatete iha Salaun Bebora, ohin.
Aleinde ne’e, nia agradese mós ba membru Governu hotu ne’ebé servisu makas, hamutuk ho ekipa Ministériu Koordenadór Asuntu Ekonomia no Ministériu Turizmu Ambiente hodi realiza forum internasionál ne’e.
“Agradese ba ministériu hotu, imi nia kontribuisaun mak ita realiza eventu boot ida la’o ho di’ak to’o remata, agradese mós ba Parlamentu Nasionál, imi nia apoiu mak atividade ne’e bele la’o di’ak”, nia hatete.
Nune’e mós, nia agradese ba empreza nasionál hotu ne’ebé lidera hosi Prezidente Kámara Komérsiu Indústria Timor-Leste (CCI-TL) Jorge Serano ho nia ekipa tomak.
“Buat barak mak ita sei falta maibé atividade hanesan ne’e ita sei hala’o kada tinan atu buka parseiru ne’ebé mak barak liu mai servisu hamutuk ho timoroan sira iha ne’e”, nia relata.
Nia mós agradese ba media nasionál no internasionál hotu ne’ebé halo kobertura ba atividade ne’e.
“Agradese mós ba media nasionál no internasionál, imi nia servisu di’ak tebes, ho imi nia servisu mak fó informasaun ba ita-nia povu no ba ema hotu kona-ba atividade loron rua ne’e, servisu di’ak ba imi hotu”, nia hakotu.
Jornalista: Hortencio Sanchez
Editór : Zezito Silva
