OÉ-CUSSE, 12 dezembru 2023 (TATOLI – Autoridade Protesaun Sivíl (APC, sigla portugés) Rejiaun Administrativa Espesiál Oé-Cusse Ambeno (RAEOA), rejista uma-kain 14 iha sub-rejiaun Pássabe sei hetan rekuperasaun tanba hetan estragu hosi dezastre naturál anin-sobu rezulta aat totál.
Notísia relevante: Protesaun Sivíl Oé-Cusse ho parseiru avália servisu atu hadi’a iha futuru
Prezidente APC Oé-Cusse, Inspetór Polísia Herman Metan, informa, kronolojia akontesimetnu ne’e akontese iha semana kotuk inísiu dezembru 2023 ne’e, akontese dezastre naturál iha sub-rejiaun Pássabe, uma 27 hetan estragu tanba kauza hosi anin mak sobu iha loron ida nia laran.
Nune’e parte Autoridade Protesaun Sivíl, halo avaliasaun hatudu katak, iha uma 14 mak tama ba kategória aat totál tanba anin sobu hahú hosi kakuluk to’o kraik, balu aat natoon no balu aat kmaan.
“Depois akontese, komisaun dezastre naturál iha suku sira relata kedas informasaun, katak iha akontesimentu anin boot estraga uma 27 iha suku Abani, sub-rejiaun Pássabe, maibé suku 14 mak tama kategoria aat totál,” Prezidente APC Oé-Cusse, Inspetór Polísia Herman Metan.
Tán ne’e Autoridade Protesaun Sivíl Oé-Cusse, responde kedas iha mumentu ne’e ho apoia emerjénsia, depois halo verifikasaun ba sira-ne’ebé estraga totál, estraga kmaan no natoon, nune’e bele kanaliza ba nasionál, atubele halo identifikasaun no hetan aprovasaun nune’e bele hetan apoia rekuperasaun ba uma.
“Ne’ebé uma-kain 14 ne’e maka tama aat totál, sira hetan rekuperasaun liuhosi materiál konstrusaun atu halo fali uma dignu,” nia informa.
Notísia relevante: Governu apoia materiál konstrusaun ba vítima dezastre naturál 26 iha Oé-Cusse
Entretantu, Autoridade Protesaun Oé-Cusse durante ne’e oferese apoia emerjénsia sira, akompaña mós ho parsériu sira hanesan Cruz Vermelha Timor-Leste (CVTL) filiál Oé-Cusse no sosiedade sivíl sira.
Jornalista: Abílio Elo Nini
Editór: Evaristo Soares Martins
