DILI, 21 dezembru 2023 (TATOLI)– Polísia Nasionál Timor-Leste (PNTL), liuhosi Departamentu Tránzitu Seguransa Rodoviária Nasionál nota katak, durante ne’e servidór Estadu hanesan Diretór-jerál no Xefe Departamentu sira utiliza veíkulu Estadu tula oan ba eskola, no ba han meiudia.
Maske iha ona regra ne’ebé fó sai no ekipa konjunta sira implementa ona hodi kontrola veíkulu Estadu ne’ebé sirkula liu oras servisu no tempu ferias, ba ida-ne’e, realidade ekipa konjunta kompostu hosi Ministériu Finansa (MF), Inspesaun Jerál Estadu, Ministériu Transporte no Komunikasaun (MTK), Polísia Nasionál Timor-Leste (PNTL), Komisaun Antí-Korrupsaun (CAC, sigla portugés) no Komisaun Funsaun Públika (CFP, sigla portugés), prende ona veíkulu Estadu hamutuk 11 no prosesu iha ona KFP no KAK, maibé situasaun ne’e kontinua akontese.
Komandante Tránzitu Rodaviaria Nasionál, Asistente Superentidente Luís Soares fó sai katak, ekipa konjunta halo monitorizasaun no fiskalizasaun ba veíkulu Estadu bazeia ba dekretu-lei númeru 80/2022 kona-ba regulamentu viatura Estadu nian, dekretu-lei númeru 6/2003, 30 abríl kona-ba Kódigu estrada, sirkulár númeru 003/GPM/111/2009 kona-ba jestaun tékniku karreta Estadu, sirkulár númeru 001/GPM/X/2012 kona-ba kontrola movimentu viatura Estadu no padraun prosedimentu operasionál.
“Bazeia ba regulamentu sira ne’ebé atribui kompeténsia ba ekipa konjuta maka konsege prende kareta Estadu no funsionáriu ne’ebé utiliza. Dadaun kazu hamutuk 11 mak ninia prosesu iha Komisaun Funsaun Públiku no Komisaun Anti Korupsaun, restante ne’ebé laiha indikasaun hosi patrimóniu Estadu entrega fila”, Komandante ne’e relata.
Komandante ne’e akresenta, utiliza kareta Estadu forsa hosi oras servisu no tempu feriadu tenke iha despasu hosi superiór ho justifikasaun klaru, bainhira laiha maka Polísia Tránzitu prende.
“Tanba ne’e ekipa konjunta nafatin apela ba servidór Estadu katak, hahú hosi Diretór-jerál to’o Xefe Departamentu sira katak, kareta Estadu labele uza fali karreta Estadu ba nesesidade privadu, pur ezemplu dader ba servisu motorista ba tula fali sira iha uma, ida ne’e labele, kuantu mais tula tan sira-nia oan ba eskola, ne’e viola ne’ebé polísia tránzitu hetan prende. Ezemplu ida tan maka bainhira meiudia labele lori kareta ba han maiudia tanba iha regra maibé servidór Estadu barak mak sei viola regra ne’e”, nia tenik.
Sorin seluk, Polísia Tránzitu mós sei halo kontrolu ba kareta Estadu sira ne’ebé sirkula iha loron boot (natal no tinan foun) tenke iha karta autorizasaun bainhira laiha maka sei prende no submete ba Patrimóniu Estadu hodi halo prosesu kontinuasaun.
Notísia relevante : https://tatoli.tl/2023/06/02/ekipa-konjunta-nota-ministeriu-balun-utiliza-viatura-estadu-ba-interese-privadu/
Jornalista : Antónia Gusmão
Editór: Rafael Ximenes de A. Belo
