DILI, 22 dezembru 2023 (TATOLI) – Ministra Edukasaun (ME), Dulce de Jesus Soares promete katak planu no polítika atu hasai komunidade ne’ebé okupa resintu eskola iha territóriu nasionál ne’e sei akontese iha tinan 2025. Hahú 2024 bá-oin, ME sei prepara nia prosesu atu nune’e labele hasai komunidade ho obrigatória.
“Bainhira ema ida ka abitante ida mak hela ona iha fasilidade eskola sira, Ministériu Edukasaun sei labele ba duni-sai de’it ema sira-ne’e maibé ita tenke halo prosesu administrasaun ida ho loloos nune’e ita-nia komunidade bele sai ho dignu,” Dulce ba jornalista sira iha salaun VIP ME, Vila Verde, sesta ne’e.
Notísia relevante: Komunidade okupa área eskola, pre-eskolár lima iha Dili labele konstrui
Nia dehan bainhira Ministériu Edukasaun atu hasai komunidade husi resintu eskola, dalan primeiru ne’ebé ME tenke halo mak presiza haree fali arkivu ministériu nian kona-ba karta hira mak ME hasai ona ba Ministériu Justisa no Sekretaria Estadu Terras no Propriedade kona-ba asuntu refere, nune’e bainhira parte tolu kontinua halo fali diskusaun ruma bele bazeia ba karta no preokupasaun saida mak antes ne’e diskute tiha ona.
Tuir nia katak servisu atu re-integra komunidade husi área eskola bá fali sira-nia horik-fatin ne’e responsabilidade ministériu rua nian (Ministériu Justisa no Sekretaria Estadu Terras no Propriedade), nune’e bele fó biban ba Ministériu Edukasaun bele hala’o ninia servisu hodi dezenvolve eskola sira hodi garante kualidade ba estudante sira.
Ministra rekoñese katak komunidade ne’ebé okupa arredór eskola nian kauza husi referendu 1999. Entre okupante sira, minstériu identifika balun profesór no balun mós mai husi komunidade baibain sira.
Jornalista: Tomé Amado
Editór: Rafael Ximenes de A. Belo
