DILI, 17 janeiru 2023 (TATOLI)–Diretór Servisu Edukasaun Munisípiu Dili (DSEMD), Carlito Soares, hateten eskola edukasaun pre-eskolár lima iha Dili oras ne’e daudaun laiha ona espasu ba Ministériu Edukasaun atu konstrui tanba komunidade okupa hotu ona area eskola sira.
Diretór Servisu Edukasaun Dili ne’e hatutan, iha tinan ida-ne’e ministériu iha planu atu realiza tan projetu konstrusaun foun ba eskola ensinu báziku hamutuk 12 iha Dili. maibé iha eskola edukasaun Pre-eskolár lima mak laiha ona espasu atu konstrui tan.
Eskola sira-ne’e mak hanesan edukasaun Pre-eskolár (EPE) moris foun iha Manleuana, EPE Fatumeta, EPE Mota Ulun Taibesi, EPE Amigo de Jesus no EPE Kulau-Laletek tanba eskola sira-ne’e iha balun tékniku sira tun ona ba terrenu atu sukat ra,i maibé labele ona tanba laiha espasu no iha razaun seluk komunidade mak lakohi oferese rai atu konstrui eskola.
“Durante ne’e, Ministru Edukasaun kontinua halo hela negosiasaun ho komunidade maibé ha’u la tolera ona tanba iha área eskola lubuk ida mak komunidade okupa hotu ona. Ha’u hanesan Diretór Servisu Edukasaun Munisípiu Dili la tolera tan ona, tanba eskola sira-ne’e ema domina hotu ona entaun laiha tan ona espasu atu konstrui tan eskola sira ne’e,” Carlito Soares hateten ba Agência Tatoli iha ninia servisu fatin Comoro, tersa ne’e.
Ministériu Edukasaun mak la foti medida ruma hodi rezolve asuntu ida-ne’e, ba futuru eskola iha Dili sei enfrenta problema boot, tanba ne’e nia apela ba komunidade ne’ebé okupa eskola EPE lima ne’e atu husik ona espasu hodi fó tempu ba Ministériu Edukasaunatu bele hala’o konstrusaun
“Ita hotu hatene eskola sira-ne’e perténsia ba ita hotu, bainhira sira la kumpre sei iha dalan seluk atu bele responde tanba eskola la’os fatin atu ema ba hela maibé fatin atu ema ba buka matenek,” nia dehan.
Nia informa, daudaun ne’e edukasaun Dili identifika ona totál família hamutuk 73 mak agora daudaun okupa hela fasilidade eskola iha Dili.
Dadus hirak ne’e, nia submete ona ba Ministériu Edukasaun atu Ministru bele foti desizaun ruma iha mandatu VIII Governu Konstitusionál ne’e.
“Ita-nia ministru informa ona mai ha’u atu semana ida-ne’e nia laran, ami sei tuur hamutuk ho Ministériu justisa atu bele rezolve tiha asuntu kona-ba problema eskola nian, atu ba futuru labele iha tan komunidade ida mak ho intensaun hakarak ba okupa tan rai eskola nian,” nia hateten.
Jornalista : Tomé Amado
Editór : Cancio Ximenes
