DILI, 28 dezembru 2023 (TATOLI)– Governu liuhosi Ministru Asuntu Kombatente Libertasaun Nasionál, Gil da Costa Monteiro ‘Oan Soru’, hateten, iha loron 31 dezembru nu’udar loron eroi nasionál, tanba ne’e iha komemorasaun tinan ne’e husu atu públiku hothotu partisipa liu-liu ne’ebé hela iha kapitál Dili.
“Fó hatene ba públiku tomak liu-liu hirak ne’ebé iha Dili katak, iha 31 dadeer tuku 07:00 otl husu ba populasaun, liliu foin-sa’e sira, Autoridade Lokál sira atu hamriik iha estrada sorin-sorin hodi akompaña marsa hosi Palásiu ba Rotunda, nune’e hothotu bele iha sentimentu reflesaun ba loron ida-ne’e ho kle’an, no atu nune’e ita bele hanoin ba pasadu ne’ebé moruk ho ita-nia eroi sira ne’ebé husik ona ita, no ita bele fiar aan no hamriik metin hodi lori nasaun ne’e ba oin tuir mehi ne’ebé sira husik hela ba ita sira ne’ebé sei moris”, Oan Soru hato’o apelu ne’e liuhosi konferénsia imprensa, iha salaun CCLN Comoro, kinta ne’e.
Governante ne’e hatutan, ho komemorasaun ne’e atu relembra ita-nia eroi sira ninia mate no loron ida ne’e mak sai loron espesífiku ba mate saudozu Nicolau Lobato ninian hanesan Prezidente Repúblika iha tempu ne’ebá no Prezidente Partidu FRETILIN.
Atividade sira ne’ebé mak sei hala’o iha loron ne’e mak hanesan, iha loron 30 sei realiza misa iha Parokia Metinaru dader tuku 09:00 otl, sai misa lori ai-funan ba tau iha Jardim Eroi Metinaru.
Iha loron 31, dader tuku 07:00 otl hothotu sei konsentra hamutuk iha Palásiu Prezidensiál, hodi marsa la’o ain hosi Palásiu ne’e to’o rotunda Nicolau Lobato, Comoro, to’o ne’ebá hahú formatura tuir kedas diskursu hosi Prezidente Repúblika, José Ramos Horta, no tau ai-funan depois fahe malu.
Biban hanesan, Sekretáriu Estadu Dezenvolvimentu Lokál, Mateus dos Santos Tallo, hatutan, iha parte kalan nian atividade sei kontinua iha Palásiu Prezidensiál, ne’ebé sei iha diskursu hosi Xefe Estadu.
“Hakarak informa ba públiku tomak katak depois seremónia loron 31 dadeer iha Rotunda Comoro, iha seremónia kontinuasaun iha 31 kalan iha Palásiu Prezidensiál, seremónia ne’e sei hahú tulu 21:00 otl to’o tinan tuan troka ba tinan foun. Iha kalan ne’e sei halo reflesaun, no públiku tomak sei akompaña diskursu hosi Xefe Estadu ba povu hodi simu tinan foun 2024”, nia tenik.
Loron 31 dezembru nu’udar loron ne’ebé saudozu Nicolau Lobato hakotu nia iis iha kombate, tan ne’e loron ne’e mak Estadu deside sai loron Nasionál Éroi.
Iha loron nasionál éroi ne’e, hanesan loron atu hanoin hikas Saudozu Prezidente Repúblika Demokrátika Timor-Leste (RDTL) no Komandante em Chefe das FALINTIL, Nicolau dos Reis Lobato nia mate iha 31 dezembru 1978, ne’ebé sakrifika-an hodi lori Timor-Leste hetan independénsia ho filozofia moris ‘A Última Bala é a Minha Vitória’.
Nicolau Lobato moris iha 24 maiu 1946 iha Sasatan-oan, Aitara Hun, Soibada, postu administrativu Laclubar, munisípiu Manatuto. Nia hanesan oan dahuluk hosi aman Narcísio Manuel Lobato hosi Leorema, postu administrativu Bazartete, munisípiu Liquiçá no inan Felismina Alves Lobato, hanesan Soibada-oan ne’ebé moris iha Malurucumo ka Macadique, postu administrativu Uatulari, munisípiu Viqueque.
Entretantu, Tema ba kemorasaun mak ‘Memoria Heroi sira mak sai hanesan naroman no lalenok ba jerasaun kontinuadór, hodi hametin esperítu nasionalismu no patriotismu ba foin sa’e sira. Prepara a’an ba….! Sai heroi foun…!
Notísia relevante : https://tatoli.tl/2019/12/31/loron-eroi-nasional-nicolau-lobato-mak-povu-nia-lider/
Jornalista : Antónia Gusmão
Editór: Rafael Ximenes de A. Belo
