DILI, 08 janeiru 2024 (TATOLI)—Ministériu Agrikultura Pekuária Peska no Floresta (MAPPF) no Sekretaria Estadu Floresta (SEF) konsege halo produsaun viveiru ai-kameli hamutuk 60.000 iha tinan 2023.
“Governu nia planu kada tinan prodús viveiru millaun 1, maibé ita labele kobre to’o númeru ne’e tanba razaun orsamentu ne’ebé aloka iha Diresaun Floresta ne’e kiik, entaun ita halo de’it produsaun viveiru ai-kameli hamutuk 600.000 no kuda 300.000,” Diretór Nasionál Jestaun Floresta Basías Indrográfuka no Área Mangais, Adalfredo do Rosário Ferreira, informa ba Agência Tatoli, iha ninia knaar fatin, Caicoli, segunda ne’e.
Produsaun viveiru ne’e rasik sentru permanente iha Maubara Liquiçá, Manufahi, Viqueque no Lautém, nomós viveiru komunitária hamutuk unidade ualu iha munisípiu sira hanesan Aileu, Ainaro, Baucau, Bobonaro, Cavalima, Mantuto no Ermera.
“Sentru viveiru sira ne’e mak sai ita-nia modalidade ida halo produsaun ai-oan sira ne’e hafoin distribui ba komunidade no Governu kuda hanesan investimentu ida. Ba tinan ne’e, ho Orsamentu Jerál Estadu ne’ebé aloka mai Sekretaria Estadu Floresta ne’e ho valór $400.000 ba bens no servisu, entaun ita tenke fahe fali ho atividade balun. Ami iha planu tinan ida-ne’e ho orsamentu limitadu ba ai-kameli sei prodús de’it 250.000 to’o 300.000,” nia akresenta.
Notísia relevante : MAP planeia alarga planta ai-kameli ektare 100 iha munisípiu rua
Aleinde ne’e, Governu kuda no distribui ai sira seluk hanesan ai produsaun hanesan hudi, kulu jaka, ai-ata, rambutan, kakau, baunilla no seluk tan, enkuantu ai konservasaun mak hanesan ai-kameli, ai-mahonik, saria, samtuku ai-hali, ai-kakeu, ai-kase ai-teka no seluk tan.
“Ita distribuisaun ai-kameli, ai protesaun no produsaun ba agrikultór sira bazeai ba pedidu ne’ebé tama, sira husu hira ita fahe, ne’ebé dadus loloos agrikultór hirak ne’e barak tanba kuda iha munisípiu hotu la inklui Rejiaun Administrativa Espesiál Oé-cusse no Ambeno,” nia tenik.
MAPPF nia akompañamentu ba agrikultór sira ne’ebé kuda ai-oan sira inklui ai-kameli ne’e maka fó asisténsia tékniku hahú hosi pedidu to’o kuda.
Governu rasik halo investimentu ai-kameli iha Bobonaro Atabae iha rai ektare 150 kuda iha tinan 2020, agora liu ona númeru ne’ebé iha, Zulo Covalima ektare 100, Viqueque ektare 100 liu, no ektare lima to’o neen iha Baucau no Balibo.
Jornalista : Arminda Fonseca
Editora : Julia Chatarina
