DILI, 15 janeiru 2024 (TATOLI) – Defeza hosi António da Conceição ‘’Kalohan’’, Advogadu Privadu Pedro Camões, dehan notifikasaun, to’o agora seidauk simu hosi Tribunál Judisiál Primeira Instánsia Díli kona-ba desizaun Tribunál nian ba nian kliente.
“Ha’u seidauk simu karta notifikasaun ruma hosi Tribunál ligadu ho desizaun Tribunál Primeira Instánsia nian ba ha’u nia kliente António da Conceição”, Pedro Camões hateten ba jornalista sira iha TJPID, Segunda, ohin.
Nia dehan, Tribunal bainhira notifika ona parte Defeza mak Defeza bele submete rekursu hosi loron ne’ebé simu notifikasaun. Ida-ne’e mak tramitasaun prosesuál.
“Maibé to’o agora Tribunál mós seidauk notifika ha’u no ha’u rasik seidauk simu akordaun finál hosi Tribunál nian ba ha’u nia kliente”, nia salienta.
Iha fatin hanesan, Defeza Arguidu Apolinario dos Santos, Defesór Públiku Marçal Masquerinhas, hateten Tribunál seidauk notifika nian ba desizaun ne’ebé mak Tribunál foti ona ba kliente.
“To’o ohin loron ha’u seidauk simu notifikasaun ruma hosi Tribunál relasiona ho desizaun Tribunál Judisiál Primeira Instánsia ba ha’u nia kliente”, nia afirma.
Nia esplika, Defeza atu hatama rekursu hodi kontra desizaun ruma hosi Tribunal Judisiál Primeiru Instánsia nian, Tribunál tenke notifika uluk parte Defeza.
“Iha notifikasaun ne’e Tribunál tenke notifika ba Defeza katak akordaun Tribunál nian mak ne’e, ida-ne’e mak desizaun Tribunál hafoin ida-ne’e no sura hosi loron ne’ebé Defeza simu notifikasaun ne’e mak Defeza sei haree hafoin aprezenta rekursu hodi kontesta desizaun Tribunál nian”, nia afirma.
Marçal hateten, prazu ba rekursu tuir Kódigu Prosesu Penál artigu 300, iha loron 15, maibé alterasaun Kódigu Prosesu ne’ebé entra no vigór ona ne’e prazu ba rekursu iha loron 30 nian laran.
“Ba ha’u nia kliente Apolinario ha’u prepara ona rekursu, kuandu ha’u simu notifikasaun hosi Tribunál ne’e ha’u hatama kedan rekursu hodi kontra desizaun Tribunál”, nia konklui.
Rekorda fali katak iha segunda (8/1) Juiz prosesu ne’ebé kaer kazu António Conceição ba projetu eskavasaun masin Atabae, Juiz Ivan Suritai, deside pena efetivu tinan lima ba arguido antigu Ministru MCI António Conceição ba krime partisipasaun ekonómia no negósiu tanba durante julgamentu, faktu sira provadu katak arguidu komete duni krime ne’ebé Ministériu Públiku imputa iha nia akuzasaun.
Arguidu Apolinario dos Santos Tribunál kondena pena efetivu tinan haat ba krime partisipasaun ekonómia no negósiu tanba durante julgamentu, faktu sira provadu katak arguidu komete duni krime ne’ebé Ministériu Públiku imputa iha nia akuzasaun.
Arguidu Domingos Goveia nudar nain ba empreza Hugo Amor Unipessoál Lda ne’ebé hetan fiar hosi Ministru Komérsiu Indústria ba projetu eskavasaun masin fatuk iha Atabae, Tribunál deside hodi absolve arguidu hosi krime administrasaun danoza no aplika pena indeminizasaun ho valór osan $17.000. Tanba konsidera arguidu nia hahalok ne’e hamozu hosi prezuiju ba Estadu ho valór kuantia $17.000.
Notísia relevante : Pozisaun Defeza Apolinario no Kalohan ba pena efetivu ne’ebé atribui hosi Tribunál
Tribunál aplika pena efetivu tinan lima ba António da Conceição
Jornalista: Natalino Costa
Editór : Zezito Silva
