DILI, 22 janeiru 2024 (TATOLI) – Polísia Unidade Marítima (UPM) presiza membru 600 hodi reforsa atividade vijilánsia iha tasi hodi asegura rekursu naturál mariñu, liuliu atu halo kontrolu ba atividade peska ilegál.
Komandante UPM, Superintendente Polísia Eugénio Pereira, haktuir katak durante ne’e sira enfrenta difikuldade boot ida iha servisu UPM nian tanba falta rekursu atu koloka iha zona sira ne’ebé maka dalabarak sempre mosu atividade peska ilegál sira.
“Ami sempre aprezenta ba komando kona-ba difikuldade sira ne’ebé maka ami enfrenta iha terrenu. Ami espera katak depois remata formasaun ba kadetes sira, komando jerál sei haree mós prioridade ba Polísia Unidade Marítima nian”, Komandante Eugénio hatete iha Lecidere, ohin.
Superintendente Polísia ne’e haktuir katak daudaun ne’e UPM iha ona membru hamutuk besik 200, maibé balun la ativu ona tanba sira iha kondisaun saúde ne’ebé la permite atu halo serbisu, inklui balun sei bá kontinua sira-nian estudu iha rai-li’ur, tanba ne’e maka UPM falta rekursu.
“Daudaun ne’e laiha membru ne’ebé sufisiente atu koloka hodi kobre iha postu efetivu sira ne’ebé maka estabelese iha kada área sira ne’ebé identifikada ona. Ami-nian planu presiza tan membru 600 hodi bele responde ba iha área sira ne’ebe maka identifikadu ona”, dehan.
Tuir nia, planu estratéjiku sira ne’e komando PNTL konsidera ona no husi meta ida ne’e maka komandu UPM sei utiliza hanesan matadalan ida atu kontinua dezenvolve rekursu UPM nian ba futuru ida di’ak liután.
“Maske ita-nian rekursu limitadu, maibé iha postu Biloi no Akrema Ataúro ne’e funsiona nafatin. Ita koloka membru hamutuk na’in-sai maka hala’o hela vijilánsia iha postu refere. Ne’ebé kuandu iha atividade peska ilegál sempre iha komunikasaun ho Komando UPM hodi apoia speed boat atu mai halo kontrola iha zona refere”, katak.
Durante ne’e, postu iha postu rua refere laiha ekipamentu sufisente, entaun presiza apoia husi Komando UPM, maibé ba oin komando kuandu iha ona membru no ekipamentu ne’ebé sufisiente sei koloka ba postu Biloi ho Akrema ne’e ho númeru ne’ebé hanesan.
Jornalista: Tomé Amado
Editora: Maria Auxiliadora
