DILI, 23 janeiru 2024 (TATOLI)–Ministériu Finansa (MF) liuhosi Diresaun Jerál Tezouru konfirma katak, saláriu ba entidade Estadu tomak iha janeiru 2024 la’o normál tanba sistema orsamentu la’o di’ak hela.
“Ha’u hakarak klatifika katak, ein termu sistema iha prosesu saláriu payroll ita laiha problema tanba daudaun ne’e saláriu ba eis-titulár sira ami prosesa no haruka ona ba banku. Loos duni iha mudansa kódigu, entaun ita presiza mós ajusta ema sira-ne’e uluk ho kódigu ida-ne’e, agora ba fali kódigu foun, tanba ne’e presiza tempu oitoan hodi ajusta ne’e mak fulan-janeiru ne’e loloos simu saláriu iha loron 22 maibé tarde oitoan, simu iha loron 24, maibé ein termu sistema laiha problema,” Diretora Jerál Tezouru, Regina de Jesus de Sousa, informa ba Agência Tatoli, iha edifísiu MF, Aitarak-laran, tersa ne’e.
Notísia relevante : MF divulga dekretu-lei ezekusaun OJE 2024 ba instituisaun Estadu
Nia esplika, iha polítika IX Governu nian iha mudansa kategoria sira, katak iha Governu anteriór kategoria 19 maibé governasaun atuál kategoria lima de’it, nune’e bainhira mudansa kategoria, kódigu kada ema ho ninia orsamentu mós iha mudansa.
“Entaun iha mudansa mós ema sira ne’e ba kódigu foun tanba ne’e maka saláriu ne’e tarde maibé la’ós tarde liu, uluk bele simu to’o iha loron 28 maibé ami garante katak saláriu ami haruka ona ba banku,” nia tenik.
Direjente ne’e dehan, MF sempre halo kalkulasaun , katak aban (kuarta) saláriu standar (saláriu ba funsionáriu públiku inklui membru Governu no membru Parlamentu) bele simu ona, nomós loron tuir mai saláriu ba kontratadu termu sertu sira.
“Maibé normalmente iha payroll ne’e prosesa saláriu ba eis-titulár uluk depois mak saláriu Funsionáriu Públiku no saláriu ba kontratadu no termu sertu sira. Saláriu ba kontratadu no termu sertu sira nia tama la hanesan ho sira seluk, tanba iha dekretu-lei ezekusaun hateten katak saláriu funsionáriu permanente ninia dadus tama iha payroll ne’e molok loron 12, saláriu termu sertu sira molok loron 15, ne’ebé iha prosesu payrol ne’e iha ninia kode ketak-ketak,” Diretora tenik.
Jornalista : Antónia Gusmão
Editora : Julia Chatarina
