DILI, 31 janeiru 2024 (TATOLI)–Ministériu Saúde (MS) liuhosi Institutu Nasionál Saúde Públika Timor-Leste (INSP-TL) rejista kazu dengue sa’e ba 147 no Chikungunya hamutuk 195 no iha semana ida-ne’e nia laran la aumenta.
“Moras ka pasiente dengue hahú hosi kinta (25/01) to’o kuarta (31/01) aumenta 60 no chikungunya iha 12,” Responsavel Institutu Nasionál Saúde Públika Timor-Leste (INSP-TL), Filipe de Neri Machado, hateten ba Agência Tatoli iha nia kna’ar fatin, kuarta ne’e.
Pasiente dengue hamutuk 147 ne’e kompostu hosi munisípiu Dili hamutuk 54, Baucau 34, Bobonaro 31, Liquiça 14, Lautém iha haat (4), Manatutu haat (4), Manufahi hamutuk neen (6) no Viqueque iha ema na’in-ida (1).
Kazu moras Chukungunya ho totál hamutuk 195 ne’e kompostu hosi munisípiu Dili hamutuk 88, Ermera hamutuk 81, Liquiça hamutuk 14, Lospalos hamutuk hitu (7) no iha Bobonaro hamutuk ema na’in-lima (5).
Nia hateten númeru kazu Chikungunya kuaze nafatin de’it, laiha mudansa maibé kazu númeru dengue kontinua aumenta tuir dadus ne’ebé INSP-TL iha.
Diretór ne’e hateten, kazu Chikunganya kontinua rejista ida de’it to’o agora no laiha kazu foun hosi Hospitál Nasionál Guido valadares (HNGV) no sentru saúde sira.
Jornalista : Jesuína Xavier
Editór : Cancio Ximenes
