DILI, 12 fevereiru 2024 (TATOLI)—Parlamentu Nasionál (PN), segunda ne’e, liuhosi reuniaun plenária aprova projetu rezolusaun Parlamentu Nasionál númeru 30/VI(1a) Kria Komisaun Eventuál Akompañamentu Prosesu Adezaun ba Asosiasaun Nasaun Sudeste Asiátiku (ASEAN) ho rezultadu votasaun a-favór 56, kontra no abstensaun 0.
Notísia Relevante: PN sei kria komisaun ida apoiu Timor-Leste adere ba ASEAN
“Nune’e pasa. Husu bankada parlamentár indika nia membru hodi bele forma meza hodi ita hato’o ba Governu. Bainhira Sekretária ASEAN mai ita mós prepara ona novidade di’ak ba Parlamentu hotu-hotu katak, Timor-Leste espesífiku, ita iha preokupasaun ba ida-ne’e,” Prezidente Parlamentu Nasionál, Maria Fernada Lay, hateten iha sala plenária PN.
Projetu rezolusaun ba kriasaun komisaun eventuál ne’e rekoñese importánsia no potensiál benefísiu adezaun Timor-Leste (TL) ba ASEAN.
Konsidera númeru inisiativa lejislativa no instrumentu internasionál hosi kompeténsia PN nian ne’ebé nesesáriu atu aprova iha ámbitu prosesu adezaun ba ASEAN, nu’udar nesesidade kumpre prosedimentu prazu previstu iha roteiru.
Komisaun eventuál ne’e estabelese mekanizmu espesífiku hodi garante partisipasaun ativa no efikás PN iha ámbitu prosesu adezaun.
Komisaun eventual nia kompeténsia ne’e mak akompaña atividade Governu iha ámbitu prosesu adezaun TL ba ASEAN no elabora, submete apresiasaun iha plenária PN, relatóriu, paresér no projetu-lei ou rezolusaun ne’ebé konsidera pertinente ba prosesu adezaun.
Nune’e mós atu promove koordenasaun entre PN ho instituisaun nasionál ne’ebé envolve iha prosesu adezaun TL ba ASEAN.
Mandatu komisaun eventuál funsiona durante períodu lejislatura ka termina iha data ne’ebé konklui ona prosesu adezaun TL ba ASEAN.
Kompozisaun komisaun eventuál kompostu hosi Deputadu na’in-ualu (8), indika hosi bankada parlamentár sira, hanesan CNRT iha na’in-tolu, FRETILIN na’in rua, PD ida, KHUNTO ida no PLP ida.
Meza komisaun eventual nian kompostu husi prezidente ida, vise prezidente ida no sekretáriu ida.
Komisaun eventual ne’e aprezenta hosi proponente Deputadu CNRT, Patrocínio dos Reis Fernandes, Deputadu FRETILIN, Aniceto Longuinhos Guterres Lopes, Deputadu PLP, Helder Freitas ‘Kamarudi’ no Deputadu PD, Manuel Henrique Noronha.
Jornalista : Nelson de Sousa
Editór : Cancio Ximenes
