DILI, 29 feverieru 2024 (TATOLI)— Institutu Apoiu Dezenvolvimentu Empresariál (IADE) halo lansamentu Kompetisaun Planu Negósiu Inovativu (KPNI) 2024 ba dala-10 iha Sub-setór hortikultura ho temátiku “Kuda ba Moris Di’ak”, iha Timor-Leste (TL).
“Objetivu husi planu negósiu inovativu ne’e tau ba área hortikultura ho intensaun ida atu promove ita-nia produtu lokál sira liuliu ai-han sira ne’ebé mak ligadu ba potensialidade no liga ba polítika Governu nian atu hasa’e ai-han iha Timor-Leste,” Diretór Ezekutivu IADE, Filomeno Marcelino Belo, informa ba jornalista sira bainhira ramata lansamentu iha Hotel Novo Turismo, ohin.
Diretór Ezekutivu ne’e dehan, durasaun ba kompetisaun ne’e ohin halo ona lansamentu, aban hahú halo rejsitrasaun no nia finalidade hotu iha fulan setembru tinan ne’e tanba rejistrasaun ne’e alarga ba munisípiu hotu iha TL.
“Durasaun fulan hitu ne’e prosesu rejistrasaun bainhira hotu ita tama ba iha formasaun faze dahuluk depois hotu ida ne’e ita haree sira ne’ebé mak iha kapasidade di’ak ita bele kontinua no ida ne’ebé mak la dun di’ak ita elimina no hakat ba faze daruak ba formasaun nian hodi aprezenta sira-nia negósiu ba juri sira iha munisípiu hotu ikusliu ita lori mai nasionál to’o hetan manan-na’in anível nasionál,” nia esplika.
Ezekutivu ne’e informa, kriteiru ba kompetisaun ne’e ba joven sira idade 17-45 ne’ebé mak iha inisiativa hakarak tama iha negósiu inovativu ba setór hortikultura ne’e rasik.
“Tinan-tinan ami sempre halo mudansa ba setór sira ne’ebé mak sai prioridade mak ita hili hortikultura tanba ita liga ba polítika Governu nian atu hasa’e produtu lokál, atu hasa’e ita-nia kresimentu ekonómiku através potensialidade ne’ebé mak iha. Entaun, ita tenke investe duni ita-nia joven ba iha área potensiál sira atu bele dezenvolve ita nia ekonomia iha rai laran,” nia relata.
Diretór Ezekutivu IADE, Filomeno Marcelino Belo akresenta katak bainhira sira tuir kompetisaun ida ne’e mak manan la fasil ida maibé IADE halo servisu maka’as hodi hetan ema ne’ebé bele sai manan-na’in.
“Ami halo sakrifísiu no halo servisu maka’as hodi hetan ema ne’ebé mak atu manan-na’in, bainhira sira manan ami la husik sira mesak maibé ami akonpaña sira to’o tinan rua ezemplu sira-nia negósiu ne’e seidauk hetan lisensa karik ami ajuda halo no sira-nia produtu ne’e barak ona maibé la lori ba merkadu entaun ami ajuda lori ba merkadu no sira-nia osan mak menus karik ami bele ajuda asesu ba kréditu nian,” nia kompromete.
Diretór Ezekutivu ne’e reforsa, bainhira sira sai manan-na’in ba kompetisaun ne’e boot liu osan montante rihun $7 no ki’ik liu atus hitu.
Iha fatin hanesan, Sekretariu Estadu Pekuária, José Veira de Araujo, rekoñese, kompetisaun negósiu inovativu ida ne’e di’ak tebes ba joven emprendedorizmu sira tanba tempu ona atu halao servisu ida ne’e.
“Joven feto no mane tempu ona ita halo negósiu emprendedorizmu tanba ita haree husi parte leste to’o oeste hodi halo negósiu ida ne’e,” José Veira de Araujo afirma.
Nune’e mós, Vise-prezidente Fortalesimentu ba Emprezaria Feto iha Kámara Komérsiu Timor-Leste (CCTL, sigla portugés), Jacinta Abucau Pereira, informa, Asosisaun Emprezariál Feto Timor-Leste (AEMTL) partisipa iha lansamentu ida ne’e oinsá joven sira bele halo kompetisaun planu negósiu inovativu ida ne’e ba iha setór hortikultura nian.
“Ami-nia esperansa ho lansamentu ida ne’e partisipa la’ós mane sira, maibé feto sira mós tenke kompete tanba iha asosiasaun rasik mós iha feto sira ne’ebé mak tuir formasaun no sira mós iha ideia negósiu. Ami espera katak liu husi lansamentu ida ne’e sei hein motiva sira no informa ba sira atu hola parte iha kompetisaun ida ne’e liliu partisipa iha rejistrasaun nian nune’e bele hala’o negósiu inovativu ida ne’e iha rai-laran,” Jacinta Abucau Pereira konklui.
Entretantu, KPNI 2024 “Kuda ba Moris Di’ak” patrosinadu husi Empreza Santos, Timor Telecom no Telkomcel.
Jornalista : Felicidade Ximenes
Editór: Rafael Ximenes de A. Belo
