VIQUEQUE, 07 marsu 2024 (TATOLI)- Xefe Departamentu Laboratóriu Servisu Saúde Munisípiu Viqueque, Francisco de Carvalho, relata atividade teste masál iha munisípiu konsege deteta pasiente pozitivu tuberkoluze (TBC) na’in-162 no daudaun tuir ona prosesu tratamentu.
“Hahú hosi tinan 2023 to’o ohin kazu detadu moras TBC na’in-162. Pasiente pozitivu TBC balun sei tuir programa durante fulan neen no balun rekupera ona”, Tuir Xefe departamentu Laboratóriu Servisu Saúde Munisípiu Viqueque, Francisco de Carvalho, relata ba Agência TATOLI, iha nia knaar fatin servisu saúde munisípiu Viqueque, ohin.
Kazu detetadu ba moras TBC iha munisípiu Viqueque pasiénte sira kumpre tebes tuir programa liuliu hemu ai-moruk durante fulan neen no balun kompleta ona fulan neen.
“Laiha pasiente ida maka la kumpre no ita-nia pesoál saúde sira mós akompaña sira karik ai-moruk hotu sira oferese ba ita-nia pasiente sira”, nia afirma.
Ministériu Saúde fó ona trajetu ba SSM Viqueque hodi halo teste masál ba kazu moras TBC to’o atinje 80%, nune’e ekipa saúde munisipál sira halo hela screening ho mákina X-tray.
“Ami sei kontinua halo teste masál ba ita-nia komunidade sira, nune’e bele detata kazu TBC. Ami agora prepara tiha ona planu atu bá área rurál sira hanesan postu Uatucarbau no postu Uatulari hodi halo teste masál ba abitante sira”, nia afirma
Daudaun ne’e, ekipamentu X-tray tau permanente iha sentru saúde Viqueque Vila hodi fasilita abitante sira-ne’ebé hakarak voluntáriu ba leno sira nia moras.
Rejista kazu dengue 31
Entretantu, Servisu Saúde munisípiu (SSM), Viqueque,kontinua rejista kazu moras dengue na’in-31 no ida mate, moras ne’e afeta maioria ba labarik idade ki’ik..
“Ami hakarak relata kazu foun iha munisípiu Viqueque na’in-7, nune’e kazu sa’e ba 31 no na’in ida maka mate”, relata Diretór SSM Viqueque, Pedro da Silva Pereira.
Daudaun, Pesoál saúde sira kontinua halo observasaun no fó tratamentu ba pasiente dengue ne’ebé pasiente balun rekuperadu ona.
Atu prevene moras dengue, Diretór ne’e afirma halo ona distribuisaun ba ai-moruk abate no halo fumigasaun iha postu administrativu sira hanesan Viqueque Vila, Ossu no Uatulari.
Notísia relevante:SSM Viqueque rejista kazu dengue 24 no ida mate
Jornalista : Vitorino Lopes da Costa
Editór : Florencio Miranda Ximenes
