DILI, 04 abríl 2024 (TATOLI)–Diretór Ezekutivu Ajénsia Nasionál Avaliasaun Akreditasaun no Akadémika (ANAAA), Nilton Paiva Mau, hateten iha trimestre dahuluk (janeiru-marsu) ne´e ANAAA ezekuta OJE 2024 foin atinje 4%.
“Ami-nia ezekusaun atuál mak $36.222.35, ekivale ho 4%. Ida-ne’e ita sura hosi 01 janeiru to’o 14 marsu 2024, no progresu sei la’o nafatin no nia komitmentu hela $30.611 ho ekivale 3%,” Diretór ezekutivu ANAAA ne´e hateten ba Agencia Tatoli iha nia kna’ar fatin, Balide, kinta ne’e.
Ho porsentu kiik ne’e, nia rekoñese pursentu ne’e la tuir duni metas maibé sira nafatin esforsu no servisu mak kontinua halo avaliasaun no akreditasaun ba ensinu superiór sira tantu privada no públiku.
“Klaru ezekusaun ne’e la atinje 25% ne’ebé Governu regula hela maibé ami bele justifika katak normalmente tinan-tinan ANAAA halo programa no atividade boot liu ne’e iha terseiru semester mak akreditasaun ho avaliasaun programatika. Maibé fiar katak trimestre tuir mai bele aumentu pursentu ezekusaun ne´e,” nia dehan.
Hosi 4% ne’e ba programa finansiál manajemen, administrasaun no losjitika, kriasaun ba Plataforma inklui bens servisu no mós ekontru ho konsellu diretivu, halo viajen ba rai-li’ur hodi asina estensaun MoU ho Indonézia no Malaizia, depois formsaun sekretaria administrasaun finansa, kontinua halo monitorizasaun no avaliasaun.
“Entaun sai dezafiu ida ba ami tanba ita ezekuta la tuir trajetu ne’ebé iha maibé ba ami iha fulan-janeiru to’o marsu ne’e ladun ezekuta osan, tanba halo de’it monitorizasaun no avaliasuan de’it. Maibé, iha fulan-juñu ba leten ita sei justifika katak purentu sei boot tanba iha akreditasaun barak,” nia dehan.
PN aprova OJE 2024 ba ANAAA hamutuk $921.778, no hosi orsamentu ne’e fahe ba programa rua mak hanesan funsionamentu dezenvolvimentu institusionál ho nia osan $527.825 no edukasaun formasaun nian ho osan $393.853.
Jornalista : Osória Marques
Editor : Cancio Ximenes
