DILI, 09 abríl 2024 (TATOLI)– Federasaun Futeból Timor-Leste (FFTL), liuhusi reuniaun ezekutivu deside kontrata Simón Elissetche hosi nasaun Xile atu sai treinadór ba ekipa selesaun nasionál hodi substitui treinadór anteriór Park Soontae hosi nasaun Korea Súl.
“Ita ko’alia loos hotu ona ho treinadór Simón Elissetche atu nia mai selebra kontratu hahú iha fulan maiu to’o dezembru 2024,” Diretór Kompetisaun no Futeból Profesionál Frederico Martins hatete ba Agência TATOLI iha edifisiu FFTL Bairro dos Gruilhos Dili, tersa ne’e.
Treinadór nasionalidade Xile ne’e treina ekipa selesaun nasionál Timor-Leste Under 23 (U-23) no ekipa seniór atubele hadia fali Timor-Leste nia ranking iha Federation International Football Assosiation (FIFA) tanba dadaun ne’e Timor-Leste nian ranking tun liu kompara ho nasaun sira iha ASEAN.
“Tinan ida ne’e ita tenke hadia ranking FIFA nian, tanba agora ne’e ita nia ranking ne’e 200, ita tenke sa’e fali ba 195 hanesan ne’e, ida ne’e mak ita hakarak kontrata fali treinadór ne’e. Objetivu ida fali mós atu enfrenta jogu internasionál balun iha tinan ida ne’e,” nia afirma.
Kontratu ne’ebé FFTL fó ba treinadór ne’e bazeia ba fundu husi Asian Football Confederation (AFC) ho durasaun kada tinan. Kona-ba salaáiu ba treinadór ne’e kada fulan sei konfidensiál no seidauk bele relata ba públiku.
Kona-ba esperiénsia treinadór foun ne’e, Diretór ne’e esplika katak durante Liga Futeból Amadora (LFA) eziste hahú tinan 2015 to’o 2019 treinadór ne’e konsege lidera ona klube primeira divizaun sira hanesan Assalam, Karketu no Lalenok United.
Bainhira kaer Assalam iha tinan 2016 konsege lori Assalam sai kampiaun iha segunda divizaun no promovidu ba primeira divizaun, iha tinan 2018 ka’er Karketu Dili FC konsege lori vitória ba Karketu no sai kampiaun ba LFA no ikus liu ka’er Lalenok United mós sai kampiaun.
Entretantu, Reniuan ezekutivu FFTL iha loron 13 Marsu deside hapara kontratu ho treinadór Park, maske iha kontratu tipu rua mak nota entendimentu entre FFTL ho Korea Football Association (KFA) ne’e kontratu termina iha 2026 no iha fali tan kontratu ida selebra entre FFTL ho Park Soontae rasik ne’e termina iha 31 dezembru 2024.
“Ita hapara nia kontratu tanba fallansu tékniku ne’ebé FFTL haree fó impaktu negativu ba jogadór selesaun nasionál, tanba iha jogu internasionál lubuk ida hanesan AFC U-23 iha Kuwait joga dala-rua hasoru Xina Tipe, maioria nia la utiliza jogadór sira ne’ebé durante ne’e joga hela iha liga rai li’ur hanesan iha Indonézia, Kamboja no seluk tan. Ida ne’e sai hanesan xoke boot ida ba ita,” nia afirma.
Bainhira hapara kontratu FFTL liga kedan ba KFA katak labele extende tan kontratu ho treinadór Park Soontae tanba nesesidade balun obriga hodi labele kontinua.
TL okupa pozisaun ikus iha FIFA men’s ranking
Tuir informasaun ne’ebé fó sai hosi ASEAN Football iha tinan 2024 iha fulan-fevereiru Thailandia mak nasaun ida ne’ebé nia progresu di’ak no okupa iha tabela primeiru renking FIFA nian ho pontu 1207 (+29.97) +12.
Enkuantu segundu okupa hosi Vietname ho pontu 1195 (-41.00) -11. Tuir kedan Malázia pontu 1110 (-12.70) -2. Filipina akomula pontu 1186 (0) +1.
Indonézia iha pontu 1073 (+8.65) +4. Singapura akomula pontu 1020 (0) 0. Myanmar akumula pontu 1000 (0) 0. Kamboja akumula pontu 931 (0) 0. Laos akomula pontu 890 (0) 0. Brunei Darusalam akomula pontu 871 (0) 0 no Timor-Leste akomula de’it pontu 821 (0) 0.
Hosi situasaun ne’e, Treinadór timoroan Francisco Araújo, dehan sofrimentu ne’ebé Timor-Leste hasoru tanba liga rai-laran laiha no laiha kompetisaun ne’ebé ho tempu naruk ba jogadór sira.
“Problema ne’ebé ita iha la’ós hosi leten mak tun mai. Problema sira ne’e hahú hosi kraik mak sa’e ba. Kazu ne’e hosi nasionál mak implika ba ita nia ranking FIFA tu’un makas liuliu iha nasaun sira iha ASEAN, ida ne’e kauza husi jogu rai-laran laiha,” lamenta Francisco.
Nasaun sira hanesan Tailándia, Vietnam, Malázia no Indonézia okupa iha pozisaun aas tanba liga rai-laran la’o forte no selesaun nasionál nasaun hirak ne’e nian halo jogu amizade barak ho nasaun internasionál sira.
“Ita haree ema Tailándia, Vietname no sira seluk dezenvolvimentu futeból la’o makas tanba sira nia investimentu ba futeból ne’e maka’as, sira nia liga mós la’o makas, sira nia selesaun ba halo formasaun iha nasaun li’ur no iha jogu amizade barak. Ita nian laiha liga, laiha kompetisaun no ita ladun dezenvolve futeból nia konsekuénsia mak hanesan ne’e,” katak nia.
Tuir nia iha tinan sira ba kotuk Timor-Leste nia ranking iha FIFA sa’e nasaun sira hanesan Kamboja, Brunei no Laos tanba dezenvolvimentu futeból la’o másimu no iha liga ne’ebé ho rítmu aas.
“Ita konsege hatudu, maibé tanba ita la sériu fali iha futeból rai-laran ikus nasaun sira ne’e sa’e liu fali ita. Atu hadia fali ita nia rekór tenke esforsu maka’as,” nia hatete.
Jornalista: Hortencio Sanchez
Editór : Florencio Miranda Ximenes
