BOBONARO,15 abríl 2024 (TATOLI)-Prezidente Autoridade munisípiu Bobonaro, Alexande Pires, segunda ne’e halo enkontru ho mini komisaun revizaun orsamentál (KROP), Diretór Servisu munisipál no Administradór postu administrativu neen hodi elabora planu asaun anuál no planu investimentu munisipál ba orsamentu jerál Estadu 2025 nian.
Prezidente Autóridade Munisipál Bobonaro, Alexandre Pires hateten iha planu asaun anuál tinan oin nian sei kontinua foku ba asuntu infraestrutura bázika, saúde, edukasaun, agrikultura, bee moos, no seluk tan hodi responde ba povu ninia persiza atu nune’e bele aselera prosesu dezenvolvimentu iha munisípiu fronteira ne’e.
Notísia Relevante:Autoridade Bobonaro sei kria uluk kondisaun molok muda negosiante ba merkadu Mau-Mali
“Ita tau programa prioridade labele ses hosi problema ne’ebé povu enfrenta atu nune’e implementa labele halo projetu ketak problema ketak ne’ebé ha’u husu diretór sira tau programa tenke ho justifikasaun klaru para ha’u ba defende iha KROP nasionál para aprova hodi mai rezolve ita-nia problema,” nia hateten bainhira halo intervensaun durante enkontru elaborasaun PAA ne’ebé realiza iha salaun administrasaun munisipál Bobonaro.
Programa no planu prioridade ne’ebé trasa ona iha PAA 2025 ne’e sei lori ba dikute iha enkontru Konselu Koordenasaun Munisipál (CCM, sigla-Portugues) iha loron 17 fulan-abríl 2024, depois sei kontinua submete ba iha Ministériu Finansa iha inísiu fulan-maiu.
Entertantu, Parlamentu Nasionál aprova OJE 2024 ba Autoridade Munisipál Bobonaro hamutuk $9,270,244 hodi finansia ba programa 12, sub-programa 29 no aktividade 63, orsamentu ne’e no aloka ba kapitál dezenvolvimentu hamutuk millaun $2-resin hodi implementa Programa Dezenvolvimentu Intregadu Munisipál 13.
Notísia Relevante:Autoridade Bobonaro sei implementa projetu PDIM 13
Jornalista: Sergio da Cruz
Editór: Agapito dos Santos
