DILI, 06 maiu 2024 (TATOLI)-Meza Parlamentu Nasionál (PN), liuhusi reuniaun plenária, segunda ne’e anúnsiu no baixa proposta-lei númeru 9/VI(1a), kona-ba Medida Tutela Legalidade Urbanístika ba Komisaun E ne’ebé trata asuntu Infraestrutura atubele halo apresiasaun inisiál.
“Solisita ba komisaun foku iha serbisu proposta-lei ne’e, hanoin lei ne’e importante tebes tuir ita-nia situasaun atuál hodi ita bele aprova,’’ Prezidente Parlamentu Nasionál, Maria Fernanda Lay, hato’o iha sala plenária Parlamentu.
Komisaun referedu halo apresiasaun inisiál no audénsia públika ho entidade relevante ba inisiativa ne’e hafoin hato’o relatóriu no paresér hodi bele kontinua diskusaun iha plenária ba faze jeneralidade.
Kona-ba konteúdu detallu ba proposta-lei ne’e ho nia artigu sira meza seidauk pronúnsia tanba komisaun sei halo uluk serbisu apresiasaun inisiál.
Antes ne’e, iha 21 fevereiru 2024, Ministru Obra Públika, Samuel Marçal, aprezenta projetu proposta-lei kona-ba medida atu proteje legalidade urbanístika, iha reuniaun Konsellu Ministru ne’ebé hetan ona aprovasaun.
Nune’e, ho vigora rejime jurídiku ba edifikasaun no urbanizasaun, regula lisensiamentu ba konstrusaun no utilizasaun ba edifísiu sira, Governu presiza atu fó ferramenta legál ho loloos hodi bele garante aplikasaun rejime ida ne’e.
Inisiativa ne’e mai ho objetivu atu estabelese medida hodi proteje legalidade urbanístika, regula aktu administrativu nesesáriu ne’ebé garante hodi kumpre lejizlasaun kona-ba lisensiamentu operasaun urbanístika no edifikasaun, nune’e mós hodi kumpre instrumentu jestaun territoriál.
Liuhosi proposta-lei ida-ne’e sei aplika medida lima atu proteje legalidade urbanístika embargu, demolisaun (sobu) obra, despezu administrativu, sesasaun ba uzu no prosedimentu legalizasaun ne’ebé sei permite Governu atu atua no hadi’a legalidade urbanístika, no konsidera grau gravidade ilísitu urbanístiku no obra ne’e bele legaliza ka labele.
Notísia relevante:Governu prepara lejizlasaun regula lisensiamentu konstrusaun no utilizasaun edifísiu
Jornalista: Nelson de Sousa
Editór : Florencio Miranda Ximenes
