DILI, 15 Maiu 2024 (TATOLI) – Diretora Nasionál Veterinária, Ministériu Agrikultura, Pekuária, Peska no Floresta, Joanita Jong, informa katak atividade vasinasaun ba asu sira iha Bobonaro, Covalima, no Rejiaun Administrativa Espesiál Oé-Cusse Ambeno (RAEOA) suspende provizoriamente, tanba númeru vasinasaun animál aas ona.
Joanita Jong adianta katak iha Bobonaro rejista asu hamutuk 12.755 no vasina ona 5.659, ekivale ba 44,36%, Covalima iha asu hamutuk 7.104 no vasina ona 5.344 ka 89,63% no iha RAEOA rejista asu 10.189 no vasina 7.334 ka 71,97%.
“Maske iha munisípiu tolu ne’e [vasina] para provizoriamente, maibé stock ai-moruk vasinasaun ba moras raiva ne’e kontinua prevee ba munisípiu tolu ne’e”, dirijente ne’e dehan iha Comoro, ohin.
Nia salienta katak, iha Dili, rejista asu hamutuk 19.915 no vasina ona 16.390 ka ekivale ba 82,29% no iha Ataúro rejista asu hamutuk 1.908 no vasina ona 1.520 ka 79%. Totál asu ne’ebé rejista iha munisípiu sira ne’e hamutuk 51.871 no vasina ona 36.247.
“Bainhira iha asu balun maka seidauk vasina no hakarak hetan vasinasaun bele lori bá sentru sira”, Joanita Jong apela.
Maske iha Bobonaro, Covalima, no RAEOA atividade vasinasaun para, maibé iha Dili sei lao hela, tanba ninia área kobertura ne’e luan loos. “Daudaun ne’e, foin maka iha de’it Dili laran. Bainhira kobre hotu ona maka ekipa sei hakat fali bá Hera no Metinaro”, adianta.
Notísia relevante: Asu hamutuk 13.223 mak hetan ona vasina kontra raiva
Jornalista: Tomé Amado
Editora: Maria Auxiliadora
