VIQUEQUE, 16 maiu 2024 (TATOLI)-Diretór Diresaun Nasionál Transporte Terreste (DNTT) munisípiu Viqueque, Saul Henrique, hateten, DNTT halo ona observasaun ba sinál tranzitu liuliu pasadeira ka zebra Cross ne’ebé maioria tinta hahú lakon ona, nune’e bele pinta foun fali.
“Asuntu pasadeira ka zebra cross ne’e importante tebes ba ita-nia sidadaun sira-ne’ebé atu ultrapasa estrada. Nune’e ami tau ona planu hodi haruka pedidu ba nasionál hodi tau atensaun ba zebra cross, sinál ne’e ajuda ida atu korta dalan. Maibé agora tinta sira-ne’e lakon ona, ne’e bele difikulta ba ita-nia ema sira-ne’e la’o ain,” katak Diretór ne’e ba Agência Tatoli iha kna’ar fatin-Viqueque Vila.
Zebra cross ne’ebé identifikadu maka hanesan Ensinu Báziku Sentrál (EBC, sigla portugés) 01 nian kuaze lakon ona bele prejudika ba estudante sira-nia movimentu, administrasaun munisípiu ninia oin kuaze moos ona.
Hanesan mós iha Igreja Conceição Imaculda Viqueque Vila, edifísiu Sekretáriadu Tékniku Administrasaun Eleitorál (STAE), Loja Esperansa Boromatan, Loja LM Beloi, Klínika Madre Beloi, Rejistu Notariadu no edifísiu Servisu Edukasaun Munisípiu Viqueque nia oin kuaze tinta pasadeira lakon hotu ona.
“Fatin sira-ne’ebé ami identifika presiza tau duni sinál zebra cross tanba fatin sira-ne’e ema barak mak asesu. Nune’e ami esforsu hodi koordena ho nasionál hodi tau ba perioridade atu marka fali sinál sira-ne’e”, nia promete.
Jornalista :Vitorino Lopes da Costa
Editór :Florencio Miranda Ximenes
