DILI, 15 Junu 2024 (TATOLI) – Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, hateten envolvimentu foinsa’e nian iha Uniaun Nasionál Eskuteiru Timor-Leste (UNE-TL) iha valór ba konstrusaun Estadu.
Assanami hato’o deklarasaun ne’e iha ámbitu sorumutu nasionál UNE-TL hodi define programa nasionál, tanba iha ona akordu kompromisu ho Ministériu Edukasaun.
“Eskuteiru nasionál importante tebes ba joven timoroan hotu hodi tama atu iha nafatin karáter voluntariu, espíritu solitáriu no valór ida ne’ebé konstrui iha ita-nia konstrusaun nasaun, valór sira ne’ebé beiala sira iha”, Vise-Primeiru-Ministru afirma iha nia diskursu, iha enkontru UNE-TL, iha Senai, Becora, ohin.
Governante ne’e husu mós ba Polísia Nasionál Timor-Leste no profesór sira atu halo atividade estrakurrikulár hodi haree ba misaun no vizaun ne’ebé di’ak hodi kontribui ba ambiente di’ak, hanoin no hahalok saudavel.
“Ida ne’e kontribui ba paz no estabilidade. Timór ita hotu nian, ita idaidak halo kompromisu de onra katak respeita no hadomi ita-nia rai hodi halo kontribuisaun ba dezenvolvimentu nasionál”, nia afirma.
Ministru ne’e salienta katak UNE-TL hanesan instrumentu formadór ba joven sira sai patriótiku no hadomi nia rai hanesan referidu ba luta na’in sira. “Joven tenke sai lutadór ba paz, lutadór atu duni sai ki’ak no má nutrisaun. Ha’u husu sira bele hola parte”, nia sujere.
Iha fatin hanesan, Prezidente UNE-TL, Idelta Rodriguês, realsa konsellu nasionál no munisipál halo diskusaun ba nota entendimentu entre UNE-TL no Ministériu Edukasaun atu enkaixa atividade eskuteiru sira iha eskola.
“Ohin, ami aprezenta planu ba tinan ida ne’e no aprezenta akordu sobre nota entendimentu ne’ebé UNE-TL asina ho Ministériu Edukasaun kona-ba atividade estrakurrikulár UNE-TL iha eskola”, prezidente UNE-TL reitera.
Nia hatutan membru UNE-TL iha kada munisipiu iha ema na’in-lima mak sei responsabiliza no partisipa iha atividade estrakurrikulár iha eskola sira. UNE-TL iha membru hamutuk rihun 17 iha territóriu, ne’ebé partisipa iha atividade voluntária Estadu nian.
“Iha formasaun kona-ba formatura ba sira hodi sai sidadaun di’ak. Atividade ida iha eskola kona-ba hadomi ambiente no atividade relijiaun nian”, nia hateten.
Idelta Rodriguês informa katak iha enkontru ne’e sei diskute kona-ba planu asaun UNE-TL ba tinan 2025 nian.
Lembra katak Ministériu Edukasaun no UNE-TL, asina ona, iha Maiu, akordu atu integra atividade eskuteiru iha estrakurrikulár eskola, nune’e bele eleva estudante sira-nia koñesimentu atu sai amigu di’ak ba malu hodi mantein pás no estabilidade.
“Akordu ida-ne’e simples. Husi akordu ne’e ita sei alarma ba eskola sira hotu katak atividade eskuteiru ne’e sai atividade obrigatória atu hala’o iha eskola sira hotu”, Ministra Edukasaun, Dulce de Jesus Soares, hateten foin lalais ne’e.
Tuir akordu ne’e, sei implementa hahú husi ensinu báziku terseiru siklu to’o ensinu sekundáriu, ne’ebé ajuda dezenvolve labarik sira-nia personalidade.
Atividade ne’e sei implementa iha loron sábadu kada semana, tanba dalabarak sábadu ne’e estudante sira laiha prosesu ensinu-aprendizajen, nune’e bele prienxe kedas ho atividade eskuteiru nian.
Notísia relevante: ME no UNE-TL selebra akordu hodi integra atividade eskuteiru iha eskola
Jornalista: Jesuína Xavier
Editora: Maria Auxiliadora
