DILI, 24 Juñu 2024 (TATOLI) – Fahi haki’ak hamutuk 461 iha postu tolu iha munisípiu Manufahi mak mate ona, entre Abríl no Juñu, tanba afeta husi peste suína afrikana ka ASF, informa Diretór Servisu Agrikultura Munisípiu Manufahi, Eltino Araújo.
“Husi kazu vírus ASF ne’ebé ataka fahi iha Manufahi, iha postu tolu ne’e, ita-nia ekipa servisu veterinária halo ona intervensaun hodi vasina animál sira ne’ebé sei moris, maibé rezultadu fahi kontinua mate tanba vírus ne’e sirkula ona ba fahi sira”, Eltino Araújo dehan ba Tatoli, iha Comoro, ohin.
Tanba ne’e, nia parte husu ona ba komunidade atu kontinua hamoos fahi-luhan husi animál ne’ebé mate no buka atu hakoi lalais, nune’e labele fó impaktu ba fahi sira seluk ne’ebé sei moris, tanba vírus ASF ne’e perigu tebes bainhira da’et ona ba fahi sira.
Tuir dirijente ne’e, fahi ne’ebé mate iha Manufahi ne’e rejista iha postu Alas, Same no Fatuberliu. Husi postu tolu ne’e kompostu husi suku 10 mak hanesan iha Fatuberliu iha suku Kaikasa no Kais, iha Alas iha suku Dotik, Uma Berloi no Aitua, iha Same iha suku Betanu, Babulu, Kaituas, Letefoho no Holarua.
Diretora Nasionál Veterinária, Joanita Jong, haktuir katak ekipa veterinária ne’ebé destaka iha kada munisípiu ne’e halo intervensaun ba moras sira ne’ebé maka ataka animál sira.
“Tuir informasaun ne’ebé hatudu katak animál ho númeru mate ne’ebé boot Manufahi ne’e, ida, tanba fahi sira la sulan iha luhan, husik de’it entaun bainhira vírus ASF ne’e ataka fahi sira mate depois asu sira ba han fali lori mai da’et ba fahi sira ne’ebé haki’ak iha uma ka iha luhan”, esplika.
Nia salienta katak parte veterinária kontinua halo sensibiliizasaun ba komunidade iha Manufahi, liuliu iha postu tolu ne’e no iha munisípiu sira seluk atu kuidadu mós sira-nia animál labele husik la’o arbiru de’it, maibé sulan iha luhan atu labele han arbiru, ikus mai afeta moras no mate.
Notísia relevante: Munisípiu rua enfrenta peste suína afrikana no hamate ona fahi besik 60
Jornalista: Tomé Amado
Editora: Maria Auxiliadora
