DILI, 25 Juñu 2024 (TATOLI) – Diresaun Nasionál Bombeiru prevee rihun $480, iha planu asaun anuál 2025, atu sosa veíkulu hitu kombate ba inséndiu nian.
Diretór Nasionál Bombeiru, Paulo Maia, informa katak karreta sira ne’e sei apoia ba postu hitu ne’ebé Sekretaria Estadu Protesaun Sivíl instala ona.
“Ita iha karreta operasionál hamutuk ualu, ne’ebé durante ne’e halo serbisu hodi kombate inséndiu iha territóriu. Maibé, daudaun ne’e karreta haat maka nia idade tama ona tinan 10 to’o 15. Karreta sira ne’e nia kondisaun avaria ona, bainhira obriga beibeik bele hamosu dezastre ba membru sira ne’ebé hala’o serbisu operasionál hodi kombate ba inséndiu”, Paulo Maia dehan iha Caicoli, ohin.
Ba viatura sira ne’ebé nia kondisaun avaria, parte diresaun halo ona prosesu atu hatama iha sistema leilaun nian, nune’e bele sosa fali karreta foun.
“Ida ne’e maka ita-nia planu asaun anuál ba 2025 nian, depende ba superiór sira. Karik tau iha konsiderasaun katak presiza atu iha duni karreta foun ba Bombeiru hodi hala’o serbisu kombate ba inséndiu, entaun planu sira ne’e sei hetan konsiderasaun”, nia espera.
Postu sira ne’ebé presiza karreta kombate ba inséndiu iha munisípiu sira mak hanesan Uatucarbau-Viqueque, Tilomar-Covalima, Fatubeliku-Ainaro, Atsabe-Ermera, Bobonaro, Natarbora-Manatuto no Ataúro.
Iha postu hitu ne’e, iha ona membru efetivu profisionál hamutuk 45 maka destaka hodi hala’o serbisu atu kombate ba inséndiu.
Tuir dadus, totál membru Bombeiru efetivu profisional iha territóriu daudaun ne’e iha na’in-396.
Jornalista: Tomé Amado
Editora: Maria Auxiliadora
