DILI, 04 jullu 2024 (TATOLI)— Ministru Komérsiu Indústria (MCI), Filipus Nino Pereira rekupera ona husi nia saúde hafoin konsumu dose baluk ne’ebé kontaminadu ho frasku ka botir-rahun, iha Timor Plaza, Dili, ohin, bainhira partisipa semináriu subordinadu ho tema Vizualizasaun Internu MCI entre oportunidade no dezafiu governasaun integrasaun globál no rejionál.
Xefe Emerjénsia iha Ospitál Nasionál Guido Valadares (HNGV), Eldegar Lopes, informa, Ministru Filipus Nino Pereira ba halo tratamentu saúde iha HNGV maizmenus tuku 11-resin tanba insidente ne’ebé hetan.
“Ohin, (ministru) mai ita haree kondisaun sira hotu liuliu matan, tilun no kakorok, entaun ita-nia médiku iha emejénsia sira haree tiha la iha buat ida. Depois ba hasai raiu-X maibé kondisaun normál, la iha infesaun ruma ba ministru nia saúde,” Xefe Eldegar Lopes informa ba TATOLI via telefone, ohin.
Nia relata, parte emerjénsia konfirma fila fali médiku espesialista Ear Nose Throat (ENT) maibé kondisaun normál nafatin, entaun ida-ne’e mak profisionál saúde sira deside fila fali ba uma, tanba buat hotu kondisaun di’ak.
Antes ne’e, Ministru komérsiu indústria (MCI), Filipus Nino Pereira, hetan asidente iha ibun bainhira konsumu ai-han ne’ebé preparadu hosi traballadór Timor Plaza bainhira tuir semináriu.
“Ai-han ne’ebé Ministru Komérsiu no Indústria, Filipus Nino pereira konsumu ne’e, prepara hosi traballadores Timor Plaza ba workshop refere. Maibé, realidade snack ohin Ministru konsumu ne’e hetan frasku iha laran,” Diretora Nasionál Regulasaun Komérsiu no Protesaun Konsumidór (DNRKPK) Manuela Silva Tilman ba jornalista sira, iha Timor Plaza, kinta ne’e.
“Ita ko’alia kona-ba direitu konsumidór, bainhira empreza ida nia prepara ai-han atu oferese ba konsumidór sira tenke prepara ho kondisaun ne’ebé di’ak. Entaun kondisaun ne’ebé mak ohin sira prepra ladi’ak no akontese duni Ministru han depois hetan frasku iha laran,” Ezekutiva ne’e salienta.
Kronolojia, tuir Diretora Manuel Tilman, frasku ida-ne’e tama ona ba iha Ministru nia nanál depois hare raan sai kedas; tafui mai realidade raan mós sai kedan.
“Entaun ida-ne’e ita presiza kontaktu autoridade relevante sira hanesan PNTL no mós AIFAESA. Tanba ne’e, tama ona iha krime. Baihira seidauk konsumu mak hetan ita bele kontaktu ba AIFAESA mesak, maibé ida-ne’e produtu konsumu ona, entaun parte regulasaun komersiál tenke kontaktu ho parte rua oinsá atu haree no rezolve,” nia hatutan.
Diretora informa, Autoridade Inspesaun no Fiskalizasaun Atividade Ekonómika Sanitária no Alimentár (AIFAESA) hamutuk Polísia Nasionál Timor-Leste (PNTL) ho parte regulasaun komersiál atu haree medida saida mak atu foti.
“Ita tenke haree tanba ne’e krime, ne’e la’ós ema kualker mak han. Se ema kualker mós ami tenke defende tanba ne’e ema nia direitu, sá tan ema ne’e membru Governu ida mak konsumu hahán ne’e akontese raan sai husi ibun, nanál frasku han. Entaun ida-ne’e labele akontese tanba sira bele halo negósiu, sira bele prepara buat hotu maibé sira tenke respeita ba konsumidór sira-nia direitu,” nia konklui.
Notísia relevante:Ministru Nino konsumu ai-han ne’ebé kontamina ho frasku
Jornalista : Felicidade Ximenes
Editór: Rafael Ximenes de A. Belo
