VIQUEQUE, 05 jullu 2024 (TATOLI)- Hafoin Governu da-sia liuhusi Ministériu Edukasaun (ME) deside la kontinua profesór sira ne’ebé nia-kontratu hotu iha 31 dezembru 2023, fó impaktu ba prosesu aprendizajen eskolár iha territóriu nasionál tanba menús profesór.
Situasaun menús profesór ne’e da’et to’o Eskola Ensinu Sekundária Tékniku Vokasionál Kalo-Heda iha Postu Administrativu Uatulari, Munisípiu Viqueque tanba profesór na’in-tolu ne’ebé hanorin hela estudante sira iha Departamentu Informatika no Teknólojia (IT) nia kontratu hotu iha 31 dezembru 2023.
Notisia relevante:Profesór kontratadu Viqueque na’in-155 husi eskola 15 termina kontratu
Nune’e, Estudante Departamentu IT durante fulan-neen ona laiha profesór atu hanorin materia. Ho situasaun ne’e, Konsellu Profesór ESTV Kalo-Heda Uatulari ho inisiativa kontrata profesór na’in-tolu hodi normaliza prosesu apredizajen iha departamentu Informatika no Teknólia (IT).
“Profesór na’in-tolu ne’e, ami inisiativa bolu fila sira hodi mai hanorin ita-nia estudante Departamentu Infomatika sira. Tanba durante fulan-neen nian laran laiha profesór hodi hanorin estudante sira. Ha’u ho ha’u-nia Adjuntu Diretór mak sei foti ami na’in-rua nian osan subsídiu kargu nian mak selu osan transporte, hanesan mina nian ba ita-nia profesór sira. Kada fulan profesór ida sei hetan $20 to’o fulan-dezembru. Depois to’o fulan-neen mak ami fó tán osan transporte kada ema ida $50. Osan ida-ne’e ami sei faan eskola nian karau hodi selu profesór inklui mós seguransa eskola nian”, Diretór Ensinu Sekundáriu Tékniku Vokasionál Kalo-Heda, Postu Administrativu Uatulari,Munisípiu Viqueque, Zainal Abadin, hateten ba Agência TATOLI, I.P, ohin.
Inisiativa ida-ne’e mosu no deside husi Konsellu Profesór ho objetivu atu normaliza prosesu aprendizajen ba estudante Departamentu IT.
“Tuir loloos ne’e ami bolu profesór na’in-haat, maibé ami osan limitadu ne’ebé ami bolu uluk na’in-tolu hodi hanorin matéria eletróniku fundamentál, komunikasaun dedadús, instalasaun no manutensaun ekipamenetu informatika, sistema dijitál no arkitetura komputadór, programa Microsoft word no sei haree mós prova aptidau profesionál inklui matéria seluk ne’ebé eziste iha departamentu IT”, nia akresenta.
Notisia relevante:ME aseita inan-aman fó kontribuisaun ba eskola filiál no paralelu
Daudaun ne’e, profesór sira hahú ativa hanorin estudante sira hahú husi Segunda Feira, loron 1 Jullu 2024 no agora profesór sira kontinua hanorin estudante sira hodi prepara ba ezame segunda períodu.
“Ha’u fiar katak profesór na’in-tolu ne’ebé ami bolu sei fasilita hanorin estudante sira husi klase 1 to’o klase 3 sira, ne’ebé durante aula mamuk. Alende ne’e ami mós husu agradese ba Ministériu Edukasaun tanba profesór Departamentu IT ida horiseik liu bolsa kandidatura profesór hodi reforsa tán hanorin iha Departamentun ne’e”, nia afirma.
Tuir dadús estudante Departementu IT totál na’in 45, kompostu husi klase-1 mak estudante na’in-13, estudante klase 2 na’in-17 no estudante klase 3 na’in-15.
Departamentu Agrária ho totál estudante na’in-57, kompostu husi klase 1 estudante na’in-14, klase 2 estudante na’in-23 no klase 3 estudante na’in-20. Daudaun ne’e, profesór ativu iha eskola ESTV Kalo-Heda na’in-17.
Notisia relevante:Tinan ne’e, ME foku ba kualidade no kontinuidade prosesu ensinu no aprendizajen
Jornalista : Vitorino Lopes da Costa
Editór : Florencio Miranda Ximenes
